‘AHO PULELULU, 3 ‘O SUNE 2015
10:00AM

 

FALE ALEA ‘O TONGA

1. LOTU

2. TALI UI

3. ME’A ‘A E ‘EIKI SEA ‘O E FALE ALEA

4. LIPOOTI MEI HE ONGO MEMIPA NAʻA NA MEʻA ATU MO E TALI FOLOFOLA

Meʻa ʻa e Fakafofonga Nopele ʻo e Ongo Niuá ʻo fakahoko mai kuo lava hono ʻave ʻo e tali folofola ʻi he 3.30pm ʻaneafi. Naʻe finangalo lelei ʻa ʻEne ʻAfio ki he tali folofola pea Ne mokoi ki he ngaahi tukupa naʻe ʻoatu mei he Fale Alea mo fakamaʻalaʻala ʻa e ngaahi meʻa naʻe mokoi ki ai ʻa e Tamá ʻo tautefito ki hono fakafepakiʻi ʻo e faihalá mo e Komiti ʻa e Fale Alea naʻe fokotuʻu koeʻuhi ko e taumuʻa ko ia.

5. LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015)

Lau ʻuluaki ʻa e Lao Fakaangaanga ke fakahu atu ʻa e Paʻanga ki he ngaahi ngaue ʻa e Puleʻanga 2015/2016. Paloti ʻa e lau ʻuluaki ʻo tali 18/0.

Meʻa ʻa e Minisita Paʻanga mo e Palani Fakafonua ʻo fakamaʻalaʻala ʻa e ngaahi liliu ki he Fakamatala Patiseti, pea ko e fakalelei pe ki he ngaahi peesi ʻe niʻihi (vakai ki he tohi mei he ʻEiki Minisita Paʻanga mo e Palani Fakafonua ʻo e ʻaho 1 ʻo Sune 2015).

Lau tuʻo ua ʻa e Lao Fakaangaanga ke fakahu atu ʻa e Paʻanga ki he ngaahi ngaue ʻa e Puleʻanga 2015/2016.

Meʻa ʻa e ʻEiki Palemia Leʻoleʻo (Tokoni Palemia) ʻo fakamaʻalaʻala ʻa e Lao Fakaangaanga.

Fokotuʻu ʻe he Fakafofonga Nopele ʻEua ke tukuhifo ʻa e Lao Fakaangaanga ki he Komiti Kakato. Tali ke tukuhifo.

Lau ʻa e tohi mei he ʻEiki Minisita Paʻanga mo e Palani Fakafonua ʻo e ʻaho 19 ʻo Me 2015 ʻa ia naʻe fakahu mai ʻaki ʻa e Polokalama Patiseti Fakaangaanga ʻa e Puleʻanga ki he Taʻu Faka-Paʻanga ngata he ʻaho 30 Sune 2016; Fakamatala Patiseti 2015/2016; Faʻunga Palani Langa Fakalakalaka ʻa Tonga 2015-2025 (Tonga Strategic Development Framework 2015-2025); Palani Fakapotungaue 2015/2016 (Corporate Plan 2015/2016). Tukuhifo kotoa ʻa e ngaahi pepa ngaue ni ki he Komiti Kakato.

KOMITI KAKATO:

1. LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015); FAKAMATALA PATISETI 2015/2016; FAʻUNGA PALANI LANGA FAKALAKALAKA ʻA TONGA 2015-2025; PALANI FAKAPOTUNGAUE 2015/2016

Meʻa ʻa e ʻEiki Minisita Paʻanga mo e Palani Fakafonua ʻo fakamaʻalaʻala ʻa e Fakamatala Patiseti.

Meʻa ʻa e Fakafofonga Nopele Fika 1 Tongatapu ʻo fakamalo ki he fakamatala fekauʻaki mo e patiseti mo meʻa ʻaki ʻene tokanga pe ʻoku ʻife ʻa e Palemia ʻoku ʻikai ke meʻa ai heni. Naʻe ʻi ai ʻa e meʻa ʻa e Palemia ʻe toki kamata ʻa e ngaue ʻa e Puleʻanga ko eni he patiseti foʻou, ka ko eni ʻoku ʻikai ke ne meʻa heni pea ʻoku ngali maʻamaʻa ʻa e patiseti.

Meʻa ʻa e Minisita ki he Ngaahi Ngaue Fakalotofonua ko e ngaue naʻe fakahoko mai he ngaahi mahina ko eni ko hono fakamaʻopoʻopo mai ʻa e ngaue ʻa e Puleʻanga kuo ʻosi. Meʻa ʻa e Minisita Polisi naʻa nau meʻa pe ʻi Tonga ni ʻo fakahoko fatongia ki he fonua ʻo kau ai ʻa e ngaue ki he Hotele Dateline.

Hoko atu ʻa e meʻa ʻa e Fakafofonga Nopele Fika 1 Tongatapu ʻoku makatuʻunga ʻa e tokanga hange ko hono vahe ʻo Patangata. ʻOku ʻi ai ʻa e tokanga he ʻoku hange ko e fakatau atu e koloa ʻi he Tanoa naʻe tuku pe uike taha ki ai pea fakatau pe koloa ia he kau Minisita pea ʻoku ʻikai lave ʻa e patiseti ia ki ai.

Fakatonutonu mei he Minisita Polisi fekauʻaki mo e meʻa ki he Tanoa he ko e meʻa mahuʻinga ke lava ʻa e ngaue ke tokoni ki he Takimamata. Ko e meʻa ko ia fekauʻaki mo e pehe naʻe maumau ha meʻa he koloa ʻi loto, ko e meʻa ia ʻe hoko he fakavavevave ka naʻe fai pe fakatatau ki he lao.

Hoko atu ʻa e meʻa ʻa e Fakafofonga Nopele Fika 1 Tongatapu ko e tokanga ki he fika ko eni ʻo e patiseti ʻoku ʻomai he hiki hake ʻaki ʻa e fakahoko ngaue, ʻa ia ʻe ʻave ke fakakake mei he ngaahi pisinisi ʻa e puleʻanga kae ʻikai mei he tukuhau. Fakaʻamu ʻe lava ʻe he Puleʻanga ke toe fakaleleiʻi ʻa e tafaʻaki ko eni. Fakamalo atu ki he Minisita ki he fakamatala fekauʻaki mo e ngaue ʻa e Tanoa, ka ko e kole ke tuku mai ha kiʻi fakamatala ki Fale Alea fekauʻaki mo e meʻa ko eni. ʻI aim o e tokanga ki he tuʻunga ʻoku ʻi ai ʻa e toutai mo e ngoue.

Meʻa ʻa e Fakafofonga Nopele Ongo Niua fakamaloʻia ʻa e ngaue ʻa e puleʻanga mo hono tuhani ʻa e ngaahi resources.

Meʻa ʻa e Fakafofonga Fika 12 Haʻapai ʻo fakamalo ki he tokoni mei he Puleʻanga ki he totongi ako ʻa e fanau mei Haʻapai kae pehe ki he tokoni langa ʻi Haʻapai. Naʻe meʻa ʻa e ʻEiki Palemia ʻi he fakaʻekeʻeke ʻi Nuʻusila ʻoku ʻi he tuʻunga fakatuʻutamaki ʻa e ʻekonomika ʻa e fonua. Ka ʻi he patiseti ko eni ʻoku ngali lelei pe ʻa e tuʻunga ʻekonomika ʻo Tonga, ʻa ia ʻoku ngali kauhala kehekehe ia mo e meʻa naʻe meʻa ʻaki ʻe he Palemia. ʻOku fai ʻa e tokanga ki heni he ʻoku vakai mai ʻa e kakai ʻo e fonua mo mamani ʻo pehe ʻoku to lalo ʻetau ʻekonomika ka ko eni ʻoku kehe. ʻOku ʻi ai ʻa e fakaʻamu ke fai ha tokanga ki heni.

Meʻa ʻa e Fakafofonga Nopele Fika 3 Tongatapu (ʻEiki Sea ʻo e Fale Alea) fekauʻaki mo e meʻa naʻe lave ki ai ʻa e Tokoni Palemia mo e Minisita Paʻanga. ʻI he peesi 35 ʻo e Fakamatala Patiseti ʻoku ʻiai ʻa e kalafi ai. ʻOku meʻa ʻa e Minisita Paʻanga naʻe talu mei he 2008 ʻa e holo ʻa e ʻekonomika. ʻOku mahino mei he kalafi ko eni mape ʻo e tuʻunga ʻo e ʻekonomika, ʻa ia ʻoku ʻasi pe he kalafi ko eni ʻo tatau pe mo e meʻa naʻe hoko fakamamani lahi. Ka naʻe malava ke tau fakafepakiʻi ia ʻaki ʻa e langa ngaue ʻi he tafaʻaki kehekehe ʻo e ʻekonomika tautefito ki he maʻu ivi ke fakafoki ki he tuʻunga ko ia ʻi he 2013 ʻo fai mai ai. Ko eni ʻoku fakafuofua ke toe lelei ange ʻa e tupu fakaʻekonomika he 2015/2016. ʻOku ʻiai ʻa e fakaʻamu ke hoko atu ʻa e tupulaki ko eni.

Tokoni mei he Minisita Polisi ko e kalafi ko eni ʻoku mahuʻinga ke fakaha ʻa e factor ʻe taha ʻoku fekauʻaki moia. ʻOku mahino ʻa e tuʻunga naʻe ʻi ai ʻa e ʻekonomika fakamamani lahi. Ko e factor ʻe taha ko ia ʻoku ʻikai ke kau he ʻa e no mei Siaina he kapau naʻe kau he ʻe kehe ʻa e kalafi ia.

Kole ʻa e Fakafofonga Nopele ʻEua pe ʻe lava ke fakahu mai aipe mo e ʻuhinga ʻo e no? Ke kakato ʻa e fakamatala.

Kole ʻa e Fakafofonga Fika 15 ʻo Vavaʻu ke levaʻi lelei mei he Sea Komiti Kakato ʻa e femeʻaʻaki, ʻa ia kapau ʻe tukuange ha faingamalie ke fai ha femeʻaʻaki ʻi he meʻa fakamaʻalaʻala ʻa e Minisita Paʻanga kae toki fai ha femeʻaʻaki fakapeesi he Fakamatala Patiseti.

FALE ALEA (2PM)

Meʻa ʻa e ʻEiki Palemia ʻo lipooti mai naʻe ʻi ai ʻene folau ʻe 3 he taʻu ni ʻo kau ai ʻa e folau ki Fisi, Siapani mo Haʻamoa. ʻOku makatuʻunga pē ʻa e patiseti ko ení ʻi he Pule Lelei pea ko e patiseti ko ení ko e meʻa anga maheni pē ia ʻi hono kumi ʻe he Puleʻangá ʻa e paʻanga ke fakahoko ʻaki ʻa e ngaue ʻa e fonua.

KOMITI KAKATO

Meʻa ʻa e Fakafofonga Fika 15 ʻo fakamaloʻia ʻa e teuteu mai ʻo e patiseti mo tokanga ke hoa ʻa e fakamole mo e paʻanga ʻoku tanaki mai. Ko e hiki eni ʻo e tukuhau ka ʻoku fehuʻia pe ʻe lava nai eni ke hilifaki ki he kakai e fonua. Hange ko e “departure tax” ʻi he folau ki muli ʻoku teu ke hiki. Naʻe ʻikai tali ʻa e fakakaukau tatau ʻi he puleʻanga ʻo Tuʻivakano koeʻuhi ke fakakake ʻa e takimamata. Ko e vakai naʻa ʻoku ʻi ai ha founga ʻe taha ke tau ngaueʻaki kae ʻoua ʻe hiki eni.

Tokoni mei he Minisita ki he Ngaahi Ngaue Lalahi ko e Lao fekauʻaki mo e sipoti naʻe tali ʻi he puleʻanga motuʻa, ka naʻa nau pehe nai ʻe maʻu mei fe ʻa e paʻanga koia ke fai ʻaki ʻa e ngaue koia?

Hoko atu ʻa e meʻa ʻa e Fakafofonga Fika 15 ko e fakapikopiko ʻoku nau hiki ʻa e tukuhau. Fakatonutonu mei he Minisita ki he Ngaahi Ngaue Lalahi ʻo fakatonutonu ʻoku ʻikai ke fakapikopiko ʻa e puleʻanga ko eni.

Hoko atu ʻa e meʻa ʻa e Fakafofonga Fika 15 ʻoku lahi pe ʻa e founga ke ʻoua ʻe uesia ai ʻa e kakai ʻo e fonua. Naʻe meʻa ʻa e Minisita Paʻanga ʻe kau he paʻanga mei he tukuhau ko eni ki hono langa ʻo Teufaiva. Ka ko fe ʻa e paʻanga tokoni mei Nuʻusila mo e IRB ke ngaahi ʻaki ʻa Teufaiva?

Fakatonutonu mei he Minisita ki he Ngaahi Ngaue Lalahi ʻoku teʻeki ke hiki ha tukuhau he ʻoku pule ʻa e Fale ko eni. Pea ka ʻikai ke tali ʻe he Fale ni pea ʻe ʻikai ke tali ia.
Hoko atu ʻa e meʻa ʻa e Fakafofonga Fika 15 ko e meʻa ʻoku mahuʻinga ketau femahinoʻaki. Naʻe ʻi ai mo e meʻa ʻa e Minisita Paʻanga ʻe ʻi ai ʻa e ngaahi ngaue kehe pe ke fua ʻaki ʻa e paʻanga tukuhau koia. Ka ʻoku fiemaʻu ke fakamaʻalaʻala mai ko e ha ʻa e ngaahi meʻa koia. Naʻa ne meʻa foki ko e tuʻunga paʻanga lolotonga ʻoku lelei pe ʻa ia ko e 22m ke fai ʻaki ʻa e ngaue. Ko e fehuʻi pe ko fe ʻa e meimei 25-26m naʻe tuku atu mei he puleʻanga motuʻa ke hoko atu ʻaki ʻa e ngaue, ʻa ia ʻoku totonu ke ʻi he 28m ia he taimi ni ka ko eni ʻoku 22m pe.

Fakatonutonu mei he Minisita Polisi ko e meʻa ʻa e Fakafofonga ko e 25m naʻe toe mai, ka ʻoku teʻeki ke ʻatitaʻi ia he ʻilo papau ʻa e foʻi fika koia.

Hoko atu ʻa e meʻa ʻa e Fakafofonga ko e meʻa ia ke toki tali mai ʻe he Minisita Paʻanga he koia naʻa ne meʻa ʻaki pea ko eni kuo ne meʻa mai ngalingali ʻe ʻi ai ʻa e hulu. Pea ko eni ʻe fakalahi ʻa e patiseti ʻa e Potungaue Moʻuí mo e Potungaue Ako. Ka ʻoku fakatauange ʻoku ʻikai ko e fakalahi ʻa e vouti ʻa e Potungaue Moʻui ke fakalahi ʻenau ʻovataimi. Pea pehe pe ki he tokoni ko eni ki he lautohi siʻi ʻi he vouti ʻa e Potungaue Ako. Ka ʻoku teʻeki keu vakai ki ha meʻa ke fakaʻaiʻai ʻa e tupulaki ʻa e ʻekonomika. Ko eni ʻoku fakahoko mai ʻe hiki ʻa e tute ʻekisia ke hilifaki ki he ngaahi koloa ʻoku ngaohi fakalotofonua. ʻE hoko eni ke taʻofi ai ha toe ngaohi koloa ia ʻi Tonga ni. Ko e ngaahi tafaʻaki kehekehe koia ʻi he patiseti ʻoku mahino pe ʻa e fakamamafa ʻa e puleʻanga ka ʻoku ʻikai ha fika ke tala mai ko e lahi e ʻo e paʻanga mei he uta ʻo e toutai ki muli pe ngoue ki muli kae lava ketau ngaue fakataha ke teke ʻa e ngaahi ngaue koia. TALI MEI HE MINISITA PAʻANGA – Fakaʻaiʻai ke ʻomai ʻa e ngaahi pisinisi kenau haʻu ʻo ʻinivesi ʻi Tonga ni, ʻa ia ʻoku kau ai ʻa e maʻumaʻuluta ʻa e fonua mo malu, mo e maʻumaʻuluta ʻa e tafaʻaki fakaʻekonomika foki. ʻOku kau ai hono fakaʻataa ʻo e tukuhau ki he ngaahi ʻinivesi ʻe niʻihi hange ko e koloa langa ʻa e kautaha ʻoku nau omai ʻo langa ʻi Tonga ni ʻo fakatatau pe ki he meʻa ʻoku tau maʻu. ʻOku ʻi ai p emo e tokanga ki he tafaʻaki fefolauʻaki ke malu. Pea ʻoku ʻikai ha tukuhau heni ke ne uesia ʻa e ngaahi pisinisi pea ʻoku ʻikai hiki ʻa e tukuhau ʻekisia mo e tute ka ko e meʻa pe fekauʻaki mo e koloa ʻoku ne uesia ʻa e moʻui lelei ke loloa ʻa e moʻui kei he taʻu 65 ki he taʻu 75. ʻOku ʻiai mo e holo ʻi he tute ʻekisia ʻo e ngaahi meʻalele ʻoku ʻova he taʻu ʻe 10 ke faingofua hono ʻomi etau ngaahi meʻalele ʻoku tokoni mai mei honau kainga ʻi muli. Ko e fatongia koi a ki he sipoti ʻa e Pasifiki ko e tukuhau ʻi he feʻaveʻaki paʻanga ʻoku hilifaki ia ki he tupu koia ʻa e ngaahi kautaha feʻaveʻaki paʻanga he ʻoku fuʻu lahi pe ʻa e tupu ʻa e ngaahi kautaha ko eni ʻoku maʻu. ʻOku fakafuofua ki he 13.7m kae lava ke hiki hake ʻa Teufaiva ki he tuʻunga fakavahaʻapuleʻanga. ʻOku kei fai ʻa e talanoa mo Nuʻusila ka ʻoku teʻeki ke mahino haʻanau tokoni ka ʻoku nau ʻuluaki ʻeke mai pe ko e fiha ʻoku fakamoleki ʻe Tonga ki he ngaue ko eni. Ko e ʻinivesi ʻi he sipoti ʻi he fonua ni. Fehuʻi mei he Fakafofonga Nopele Fika 2 Vavaʻu ki he Minisita Paʻanga naʻe meʻa ʻa e Fakafofonga Fika 15 naʻe pole mai ʻa e IRB ke nau langa ʻa Teufaiva. Hoko atu ʻa e meʻa ʻa e Minisita Paʻanga ʻoku kei fai ʻa e tatali pe ʻe ʻasi mai ha meʻa mei he IRB. ʻOku teʻeki ke aʻu mai ʻa e tokoni koia. Ko e kalafi he peesi 35 ko e foʻi talanoa ia ʻo e meʻa naʻe hoko. Kapau naʻe ʻikai ke fakakau heni ʻa e langa siaina he 2012/2013 naʻe mei to lalo ʻa e ʻekonomika ia ʻi lalo he noa.

Meʻa ʻa e Fakafofonga Fika 4 fekauʻaki mo e ngaahi tukuhau ʻoku hanga ki ai ʻa e puleʻanga. Ka ʻoku ʻiai ʻa e tokanga ki he ngaahi productive sectors hange ko e ngoue mo e toutai mo ʻeku tokanga pe ʻe lava ke maʻu mai ʻa e ngaahi fika he peesi 37 ʻoku fakapeseti. ʻI hono fakahoa ʻa e ngaahi paʻanga koia mo e paʻanga mei muli [remittances] ʻa ia ko e peesi 67 ʻoku lahi ange ʻa e paʻanga ko eni he paʻanga mei he productive sectors. ʻIai ʻa e tokanga pe ʻoku ʻiai ha ngaue ʻa e puleʻanga ke fakaʻaiʻai ʻa e tafe mai ʻa e paʻanga koia, ʻo hange ko e kole mei he Minisita ki he Ngaahi Ngaue Lalahi ke fai ha tokoni ki he kakai Tonga ʻoku nau ʻova ʻi Nuʻusila. I he peesi 6 ko e takimamata ko e 11m ka ʻoku ʻave ʻetau paʻanga ki ai ka ko e 220m ki he remittances ʻoku ʻikai ketau fakakaukauʻi mamafa ha tokoni ki hotau kainga ʻi muli. Peesi 133, ka ko e kole pe ʻe lava ke ʻomai ha fakamatala mei he puleʻanga fekauʻaki mo e tafaʻaki ko eni? TALI MEI HE MINISITA PAʻANGA – Ko e fakamatala ki he paʻanga hu mai ʻi he koloa hu atu he peesi 67, ʻa ia ko e 14.7m a ia ʻoku meimei ʻi he 2m he mahina. Ko e hu koloa mai mei muli ʻoku fakafuofua ki he 22m he mahina pea feʻamokaki ʻaki ia ʻa e 20m he mahina. Pea ko e feʻamokaki koia ʻoku fakapaʻanga ia ʻe he li paʻanga mei muli. Kuo fai pe ʻa e feinga ke fakafaingamalieʻi ʻa e kakai Tonga ʻi muli hange ko e sitiseni ua, fakafaingofuaʻi ʻa e paasipooti mo e lesisita, ʻa ia ʻoku feingaʻi ke lava pe ʻo fakahoko he ngaahi ʻofisi ʻa Tonga ʻi muli. Pea hange ko e kelekele ʻoku ʻikai ke toʻo ia ʻo makatuʻunga heʻenau nofo fuoloa ʻi muli. ʻA ia ʻoku nau kei kau mai pe ki he ngaahi totonu fakalao ʻa e Tonga. Ko e fika ʻe lava keu tuku atu ʻa e mataʻifika ki he ngaue he taʻu takitaha.

Meʻa ʻa e Fakafofonga Nopele Fika 1 Haʻapai ʻo fakamaloʻia ʻa e Minisita Paʻanga hono teuteu mai ʻa e patiseti ko eni.

Meʻa ʻa e Fakafofonga Fika 9 ko e patiseti lelei eni he ʻoku aʻu ki he kakai masiva ʻo e fonua ʻa e ngaahi fokotuʻutuʻu ngaue ʻi he patiseti.

Meʻa ʻa e Minisita ki he Ngaahi Ngaue Lalahi ʻo fakamaloʻia ʻa e patiseti ʻi hono lakanga ko e Fakafofonga ʻo Vavaʻu 16.

Fakatonutonu mei he Fakafofonga Nopele Fika 2 ʻo Vavaʻu ʻoku faʻu mai pe ʻe he Puleʻanga ʻa e patiseti pea toe meʻa pe ia ʻoku lelei ʻene patiseti pea ke mahino ko ʻene meʻa ʻi heni ko e ʻEiki Minisita.

Hoko atu ʻa e meʻa ʻa e Minisita ki he Ngaahi Ngaue Lalahi ki he peesi 80 mo e kalafi 5.34 ʻoku fakapeseti mai ai ʻa e ngaahi fiemaʻu ʻa e ngaahi vahenga ʻo fakatatau ki he ola ʻo e ʻaʻahi ʻo e 2014.

Meʻa ʻa e Fakafofonga Nopele ʻEua ʻo fakatonutonu ʻoku tapu ke malanga ha Fakafofonga ʻo hikihikiʻi pe ia.

Hoko atu ʻa e meʻa ʻa e Minisita ʻi hono lakanga ko e Minisita ko e ngaahi fakaʻaiʻai ʻo e kakai Tonga ʻi muli naʻe ʻosi fakakakato ia he meʻa atu ʻa e Palemia ki muli ʻo fakataha mo e kakai Tonga ʻi muli. Naʻe ʻomai ai ʻenau ngaahi fiemaʻu hange ko e fakafoʻou ʻo e laiseni fakaʻuli.

Fehuʻi mei he Fakafofonga Fika 4 ko e meʻa ʻa e Minisita ʻe fakatau atu ʻa e laiseni fakaʻuli Tonga ʻi muli? ʻOku fakalao nai eni? Pea ko e meʻa ʻa e Fakafofonga Nopele Fika 2 Vavaʻu ʻoku lava pe kete ngaueʻaki ʻa e laiseni Kalefonia ʻi Tonga ni ʻi he foʻi vahaʻa taimi pau. Meʻa ʻa e Fakafofonga Fika 15 ʻoku fakangofua ʻi he Lao Fefonongaʻaki ke ngaueʻaki ʻa e laiseni fakaʻuli mulí ʻi Tonga ni.

Hoko atu ʻa e meʻa ʻa e Minisita ko e mahina pe eni ʻe 5 ʻa e puleʻanga ka ʻoku nau muimuiʻi ʻa e ngaahi fiemaʻu ʻa e kakai.

Meʻa ʻa e Fakafofonga Fika 12 ke kau ʻi hono tokangaekina ʻa e kakai Tonga mei muli hono fakapapauʻi ʻoku ʻikai tomui ʻa e ngaahi vakapuna. Pea ʻoku kole atu ke fakatokangaʻi ange ʻoku ʻi ai ʻa e ngaahi vahenga ʻoku ʻikai he ʻi ai ha hala puleʻanga ka ko e tahi pe, pea ko e kole naʻa lava ke vaheʻi mai ha silini ke tanu hala ke kumi ʻaki ha vaka ki he vahenga.

FALE ALEA

Toloi ʻa e Fale Alea ki he 10am, ʻaho Tuʻapulelulu 4 Sune 2015.

Go to top