‘AHO TUʻAPULELULU, 4 ‘O SUNE 2015
10:00AM

FALE ALEA ‘O TONGA

1. LOTU

2. TALI UI

3. ME’A ‘A E ‘EIKI TOKONI SEA ‘O E FALE ALEA

4. PALANI FAKAANGAANGA FAKATAʻU ʻA E ʻOFISI ʻO E ʻATITA TONGA 2015-2016

Lau ʻa e tohi naʻe fakahu mai ʻaki ʻa e Palani Fakaangaanga he ʻaho 5 ʻo Mē 2015.

Tukuhifo ʻa e Palani Fakaangaanga ki he Komiti Kakato ke aleaʻi fakataha mo e vouti ʻa e ʻOfisi ʻo e ʻAtita.

5. LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015); FAKAMATALA PATISETI 2015/2016; FAʻUNGA PALANI LANGA FAKALAKALAKA ʻA TONGA 2015-2025; PALANI FAKAPOTUNGAUE 2015/2016

Hoko atu ʻa e femeʻaʻaki ʻi he Fakamatala Patiseti

Meʻa ʻa e Minisita Tanaki Tukuhau fekauʻaki mo e taumuʻa ʻe puleʻangá ʻi he patiseti mo fakamamafaʻi ko e patiseti lahi taha ʻeni ʻa e puleʻanga. ʻOku kei ʻi ai ʻa e budget support ʻoku tokoni mai koeʻuhi ko e siʻi hotau ivi fakapaʻanga neongo ʻoku holo ʻa e fika ko eni he kuo pau ke tau feinga ke tau lava ʻo fua ʻa e patiseti kotoa. Ko e tukuhau ko ia ʻoku hilifaki ki he departure tax ʻoku ʻamanaki ia ke fakahoko ke tokoni ki he sipoti.

Fehuʻi mei he Fakafofonga Nopele Fika 2 Haʻapai pe ʻoku fiha nai ʻa e tukuhau ko eni departure tax he ngaahi fonua kehe hange ko Fisi. Tali ʻe he Minisita ki he Ngaahi Ngaue Lalahi ko Haʻamoa ʻoku 165 pea ko Tonga ni ʻoku kei maʻulalao taha. Meʻa ʻa e Fakafofonga Fika 12 ke ʻoua te tau ʻomai ʻa e tuʻunga ʻi he ngaahi fonua kehe he ʻoku kehekehe ʻa e tuʻunga fakaʻekonomika.

Hoko atu ʻa e meʻa ʻa e Minisita Tanaki Tukuhau ʻoku ʻikai ke base ʻa e meʻa ia ko eni he ngaahi fonua muli ka ʻi he tuʻunga pe ʻo Tonga ni. ʻOku ʻi ai foki mo e tukuhau ʻe toʻo ia mei he tupu ʻa e pangike kae ʻikai ko e kakai ʻo e fonua, ʻi he feʻaveʻaki paʻanga.

Fehuʻi ʻa e Fakafofonga Vavaʻu 15 pe kuo fai ha felotoi mo e ngaahi pangike ki he founga ko eni mo ʻi ai ha mafai fakalao. Tali mei he Minisita ʻoku ʻi he puleʻanga pe ʻa e mafai.

Fehuʻi mei he Fakafofonga Fika 12 pe ko e peseti ʻe fiha [ko e ha ha fika] ʻoku ʻai ke toʻo ko eni? Tali ʻa e Minisita ko e seniti ʻe 2 mei he seniti ʻe 5. ʻA ia ko e peseta ʻe 15 ʻa e margin ko eni. Toe fehuʻi mei he Fakafofonga 12, ko e fika naʻe ngaueʻaki ʻe he Minisita Paʻanga ʻaneafi ko e seniti ʻe 2 mei he paʻanga ʻe taha ka ko eni ʻoku ke meʻa mai ko e seniti ʻe 2 mei he seniti ʻe 5 ʻa ia ko e seniti lahi ia. Ko e meʻa lahi ia ke tokanga ki ai ʻa e puleʻanga. Fakamaʻalaʻala Minisita Paʻanga ko e seniti ʻe 2 mei he seniti 5 ʻo e tupu ʻa e pangike. Hoko atu ʻa e Minisita Tanaki Tukuhau ko e toʻo pe eni mei he kato ʻa e pangike. Fehuʻi mei he Fakafofonga Nopele ʻEua pe ko e ha ʻoku ʻikai ke toʻo ai mei he feʻaveʻaki paʻanga ʻa e puleʻanga? Tuku ke toki tali mei he Minisita Paʻanga. Fehuʻi mei he Fakafofonga Nopele Ongo Niua ko e paʻanga ko eni ke tokoni ki he sipoti pe ʻe lava ai ʻa e sipoti pe ʻe toe fiemaʻu ha paʻanga ki ha feituʻu kehe? Tuku ke toki tali mei he Minisita Paʻanga. Hoko atu ʻa e meʻa ʻa e Minisita Tanaki Tukuhau ki he ngaahi koloa ko ia ʻoku tute koeʻuhi ko e tuʻunga moʻui lelei ʻa e kakai ʻo e fonua. Fokotuʻu ke tali ʻa e fakamatala fakalukufua ʻa e Minisita Paʻanga.

Meʻa ʻa e Fakafofonga Nopele Fika 2 ʻo Haʻapai. Peesi 110, 6.4.4.3 Ngaahi Polokalama Tokoni ki Haʻapai. Ko e fehuʻi pe ʻe lava ʻa e tokoni ki he Afa ʻIeni ki Siulai 2015. Pe ʻe aʻusia ʻa e fakaʻamu koi a? ʻI ai mo e tokanga ki he fengaueʻaki ʻa e Komiti Fakalakalaka ʻa Haʻapai mo e World Bank. Peesi 111, ʻoku ʻasi ai ʻa e tokoni ki he ako ʻi haʻapai. Tali mei he Minisita ki he Ngaahi Ngaue Lalahi fekauʻaki mo e tuʻunga ʻo e langa ʻi Haʻapai. ʻOku kei tuʻu maʻu pe puleʻanga ke kakato e ngaue ki Siulai.

Meʻa ʻa e Fakafofonga Nopele ʻEua naʻe meʻa ʻa e Minisita Paʻanga ʻoku ʻi ai e monuʻia he holo ʻa e totongi fakamamani lahi ʻo e lolo. Ka ko eni ʻoku hange ʻe toe tanaki atu ha tukuhau ia ki ai ke fakapalanisi ʻaki ʻa e holo fakamamani lahi. ʻOku ʻi ai mo e tokanga ki he sipoti ʻo e 2019 ʻa ia ʻoku to loto pe he Palani Fakalakalaka (TSDF II) mo e fakamatala patiseti. ʻOku fakaʻau ke nounou ʻa e taimi kimuʻa he sipoti. Ko e hohaʻa ki he seniti ʻe 2 ʻoku toʻo mei he kautaha feʻaveʻaki paʻanga. ʻOku ʻi ai ʻa e toʻo mei he pangike ka ko e kakai ʻoku nau lahi ngaueʻaki ʻa e ngaahi kautaha feʻaveʻaki paʻanga kae ʻikai ko e pangike. ʻOku ʻi ai ʻa e tokanga he ʻoku ʻikai ke kau ʻa e puleʻanga heni, fefe ke ʻalu hifo kena vahevahe pe ʻa e silini ko eni ʻoku toʻo ʻe he puleʻanga mo e ngaahi kautaha feʻaveʻaki. Ko e fokotuʻu ki he puleʻanga naʻa lava ke seniti ʻe taha.
Kole mei he Fakafofonga Fika 15 ke fakamahino mai ange pe ko hai ʻa e puleʻanga? Hoko atu ʻa e meʻa ʻa e Fakafofonga Nopele ʻEua. Meʻa ʻa e Minisita Paʻanga naʻe ʻosi fai pe ʻa e sio ki ai pea ʻe ʻomai ʻa e lao ki heni fekaʻaki mo e founga hono fakahoko. Ko e feʻaveʻaki paʻanga ʻa e puleanga ko e paʻanga tokoni ia pe ko e paʻanga totongi moʻua ki muli.

Hoko atu ʻa e meʻa ʻa e Fakafofonga Nopele ʻEua ʻoku pehe p emo e paʻanga ʻa e kakai, ko e paʻanga tokoni pe moia mo e paʻanga totongi moʻua. Kapau ʻoku toʻo ʻe he pangike fakalukufua, kuo pau kenau toʻo ʻenautolu ʻa e seniti ʻe 5 mei he ʻave paʻanga ʻa e puleʻanga. Kae kapau ʻoku ʻikai toʻo ʻa e seniti mei he ʻave paʻanga ʻa e puleʻanga pea ʻoku totonu ke pehe pe mo e paʻanga ʻa e kakai. Ko e seniti ʻe 5 ko e paʻanga pe ia naʻe tonu ke maʻu ʻe he kakai ka ko e toʻo ia ʻe he pangike ko enau fee. Meʻa ʻa e Minisita Paʻanga ko e ʻave paʻanga ʻa e puleʻanga ʻoku ngaueʻaki ʻa e Pangike Pule ʻa ia ʻoku ʻikai ha seniti ia ʻe toʻo ai.

Kole mei he Fakafofonga Fika 15 ʻoku hange ʻe tonu e lau ʻa e Fakafofonga Nopele ʻEua. Fefe ke ʻomai ha taha mei he Pangike Pule ki heni he 2pm. Fehuʻi mei he Minisita Ngaahi Ngaue Lalahi ʻoku ʻikai ha fekauʻaki ʻa e Pangike Pule mo e Fale ni. ʻE ʻikai lava ke lea ha taha ia mei he Pangike Pule ʻi Fale ni. Fokotuʻu mei he Minisita Paʻanga ke ʻomai pe ha taha mei he Pangike Pule ke fai ha fakataha ʻi tuʻa p eke fai ha femahinoʻaki.

Hoko atu ʻa e meʻa ʻa e Fakafofonga Nopele ʻEua ko e poini ko hono toʻo mei he kae tuku e. ʻOku kehekehe leva ʻa e lao ia ʻo ʻikai ke tatau ki he taha kotoa. Ko e 138m. Fakatonutonu mei he Minisita Paʻanga ko e 37m he ko e 138m ia ko e paʻanga fakakatoa ia. Hoko atu ʻa e meʻa ʻa e Fakafofonga Nopele pe ʻoku fefe ʻa e teuteu ki he ipu ʻa mamani he ʻakapulu mo ha tokoni ki he poate ko ia. Meʻa ʻa e Minisita ki he Ngaahi Ngaue Fakalotofonua naʻe fai ʻa e fetuʻutaki mo e poate ka ʻoku fakaha mei he sea ʻo e poate ʻoku nau ʻosi maau kinautolu ia ʻo ʻikai fiemaʻu ha tokoni. ʻOku fai ʻa e ngaue ke ʻave ʻa e paʻanga ki he fakalakalaka ʻa e taleniti mo ha ngaahi ʻakatemi ke teuteuʻi ai ʻa e kau sipoti.

Hoko atu ʻa e meʻa ʻa e Fakafofonga Nopele ʻEua ko e taʻu kotoa pe ʻoku omai ʻa e kau sipoti ko eni ʻo kole silini. Koeʻuhi ko e ofi ʻa e taimi ke fai ʻa e feʻauhi pea ʻoku ʻi ai ʻa e fakaʻamu ke ʻomai he puleʻanga ha 7m ke ʻomai ʻaki ʻa e fanau Tonga ke nau kau ki he feʻauhi. Ko e meʻa hoko ko e ako mo e moʻui. ʻOku ʻikai ha fuʻu fakamatala he palani fakalakalaka fekauʻaki mo e ako. Fakatonutonu mei he ʻEiki Palemia ke foki mai ki he meʻa naʻa ne fokotuʻu mai fekauʻaki mo e tokoni ki he ʻakapulu. Meʻa ʻa e Tokoni Palemia koia ʻoku ne fakafofongaʻi ʻa e puleʻanga ki he poate ʻakapulu. ʻOku fiemaʻu ʻe he puleʻanga pe ko e ha ʻa e palani, ko e ha ʻa e meʻa ʻoku maʻu mei he IRB mo e ngaahi tafaʻaki kehe kae toki ʻoatu ai ʻa e tokoni mei he puleʻanga. Kuo ʻosi laumano eni ʻa e tokoni ʻa e puleʻanga ki he ngaahi timi sipoti pea ko e founga tatau pe naʻe ngaueʻaki.
Hoko atu ʻa e meʻa ʻa e Fakafofonga Nopele ki he ako ʻa ia ko e 44m mo e moʻui ko e 33m. Ko e ako naʻe ʻi ai ʻa e visone ke hiki ʻa e taʻu fakaako ki he ako tuʻupau mei he taʻu ki he taʻu 18. Ko e palani fakalakalaka ʻoku ʻikai ke ʻasi pau ai ʻa e ako tuʻupau, ʻa ia ʻoku ako taʻetotongi. Ko e palani ko eni ʻoku ʻi ai ʻa e fakatātā ai ʻoku ʻi ai ʻa e visone peesi 26 Fakamatala Patiseti pea ko e tokanga ko e tui fakakalisitiane ʻoku ʻave ia ki lalo.

Meʻa ʻa e Minisita ki he Ngaahi Ngaue Fakalotofonua ko e tokoni mei he puleʻanga naʻe ʻikai ke lahi ia ka naʻe kei fakaʻofoʻofa pe ʻa e ola ia. Ko e 2011 naʻe 1m ka ko e taʻu ni mahalo naʻa noa. Ko e meʻa pe ʻoku fiemaʻu ko e fakamatala paʻanga ki he ngaahi paʻanga naʻe ʻosi ʻoatu kae tuku atu ha toe tokoni. Meʻa ʻa e Fakafofonga Nopele Fika 2 Vavaʻu ke ʻai pe ha foʻi fika pea fai ʻaki leva ʻa e founga naʻe meʻa mai ʻaki ʻe he Tokoni Palemia.

Hoko atu ʻa e meʻa ʻa e Minisita ʻo fakamaloʻia hono fakalahi ʻa e paʻanga tokoni ki he vahenga. Hange ko e fiemaʻu vivili ʻa Haʻapai 12 ki ha vaka, ʻoku mau fiemaʻu ʻemautolu haʻamau tangike vai. Naʻe ʻi ai ʻa e meʻa naʻe meʻa mai ki ai ʻa e Fakafofonga Nopele Fika 2 Haʻapai fekauʻaki mo e ngaue ʻa e Komiti Fakalakalaka ʻa Haʻapai ʻa ia ʻoku memipa pe ai ʻa e Nopele ko eni pea ʻoku ou tui ʻoku ne meaʻi pe ngaue koi a.

Meʻa mai ʻa e Minisita Paʻanga ʻe lava mai ʻa e kau ngaue mei he Pangike Pule he 3pm ʻo fakamatala fakamahino fekauʻaki mo e ʻisiu naʻe ʻohake fekauʻaki mo e feʻaveʻaki paʻanga ʻa e puleʻanga.

Meʻa ʻa e Fakafofonga Tongatapu Fika 9 ʻo fakamaloʻia ʻa e ngaue ʻa e puleʻanga mo e ngaahi palani ko eni ke tokonia ʻa e tuʻunga moʻui lelei ki he sino. ʻOku ʻi ai ʻa e tokanga ki he maketi ki he ika mo e tuʻunga ʻo e totongi ʻo e ika he oku fuʻu mamafa. ʻOku ʻiai ʻa e kakai ko e kau “hali” pea ʻoku iku ʻo mamafa ange ai ʻa e totongi e ika he ʻoku fehangahangai ia mo e palani ngaue ko eni ʻa e puleʻanga. Meʻa ʻa e Palemia ko e kau hali pe middleman ko e meʻa fakamamani lahi ia he maketi pea ʻe faingataʻa ke taʻofi ia neongo ʻoku moʻoni ʻa e meʻa ʻoku ʻomai ʻe he Fakafofonga. Hoko atu ʻa e meʻa ʻa e Fakafofonga ʻoku totonu ke ʻai pe haʻatau meʻa ʻatautolu ʻi Tonga ni kae tuku pe ʻa e fakamamani lahi ia. Meʻa ʻa e Minisita Polisi mo e Fefakatauʻaki fekauʻaki mo e tafaʻaki ki he fakafuofua koloa, ngaahi koloa ʻoku uesia kovi ʻa e tuʻunga moʻui lelei hange ko e nutolo, mo hono toʻo ʻo e tukuhau mei he pepa kokaʻanga. Ko e toli foʻiʻakau ʻoku maʻu ai ʻa e paʻanga ka ko e skill ia he levolo pe ki lalo kae kapau ʻe fai ha tokanga ke maketiʻi atu ʻa e ngaahi skill kehe hange ko e neesi ʻe toe lelei ange ai ʻa e paʻanga hu mai ʻa e fonua.

Meʻa ʻa e Fakafofonga Nopele Fika 3 Tongatapu naʻe meʻa ʻa e Palemia ke fakasiʻisiʻi ;a e paʻanga tokoni mei muli ka ko e peesi 53 ʻo e Fakamatala Patiseti ʻoku ʻi ai ha kalafi ai ʻo e GDP. Ko e laine lanu pulu ʻi lalo ʻo ʻasi ai ʻa e holofa ʻa e tokoni mei muli pea toe foki ki ʻolunga. ʻE lava ke fakapapauʻi mai ko e holo ko eni ʻoku makatuʻunga ʻi he kakato ʻa e ngaue tokoni? Pe ko e ʻuhinga ʻa e holo ko ha holomui ʻa e donor ʻi heʻetau pehe ʻoku lahi ʻa e fakafalala ki he tokoni mei muli. Kapau ko e ʻuhinga fika 2, pea ʻoku totonu ketau holomui mei he ngaahi lea ʻoku tau toe fakamoʻulaloʻi aipe kitautolu. Tali mei he Minisita Paʻanga ko e palopalema he tokoni langa lalahi ko e paʻanga ʻoku fiemaʻu ki he maintenance. Ko e ʻuhinga pe naʻe tomui ʻa e aʻu mai ʻa e silini ia ko eni koeʻuhi ko e ngaahi meʻa naʻa nau fiemaʻu mai pea kiʻi tomui mai ai ʻa e silini tokoni.
Meʻa ʻa e Fakafofonga Nopele Fika 1 Tongatapu naʻe fakahoko mai ʻe he Minisita Paʻanga ʻa e fika ʻo e peseta tupu ʻi ʻAmelika mo Siaina. ʻOku ha he peesi 31 ʻo e Fakamatala Patiseti ʻoku tau kei ngaue vaofi pea mo Nuʻusila mo e ngaahi fonua ko ia. Kae hange ki mui ni mai ʻoku tau ʻalu ke vamamaʻo mo hotau ngaahi fonua kaungaʻapi mo ʻetau tauhi vā mo Nuʻusila mo ʻAositelelia. ʻOku fai ʻa e fifili pe ko e ha naʻe tuʻusi ai ʻe ʻAositelelia ʻenau tokoni, pea mo e ʻuhinga ʻoku ʻamanaki ke tukuhauʻi ai ʻa e kau toil hili koia ko e ʻofa ʻataʻatá pe ia ʻa Nuʻusila mo ʻAositelelia. Pea ko eni naʻe fakahoko mai ʻe tapuni ʻa e ngaahi ʻofisi ʻa Tonga he ngaahi fonua muli neongo ʻoku talamai he taumuʻa ngaue ʻoku fai e feinga ke ʻave ʻa e ngaahi ngaue hange ko e laiseni ki he ngaahi ʻofisi ko eni. ʻA ia ʻoku ʻikai kena fuʻu fekauʻaki. ʻOku fiemaʻu ke ʻoua ʻe tuʻutuʻu ʻa e ngaahi ngaue ki he ngaahi ʻofisi ʻi muli. ʻOku makatuʻunga ʻa e tuʻusi ʻo e paʻanga tokoni ko e fakafotunga ʻa e puleʻanga.

Meʻa ʻa e Palemia ʻoku ʻikai ke fuʻu mahino ki ai ʻa e malanga naʻe toki ʻosi. Ko e tokoni ʻoku ʻi loto ʻa e budget support. Naʻe ʻi ai ʻeku statement naʻa ku fai ʻi Haʻamoa pea ʻoku ou ʻilo ʻoku ʻi ai ʻa e hohaʻa ki ai. Naʻa ku fakaha ange ki he Palemia ʻo Haʻamoa ʻoku kiʻi tomui ʻa Tonga ʻi Haʻamoa, koeʻuhi ko e budget support ki Tonga ko e peseta ʻe 54 ʻo e patiseti. Kapau ʻe toʻo ia heʻikai lava ketau feau ʻetau patiseti ʻi hotau ivi pe. Ko e ʻamanaki ʻa e world bank heʻikai ke fai aipe ʻenau tokoni ʻo taʻengata. ʻE ʻi ai ʻa e taimi te nau hanga ʻo toʻo ʻenau tokoni pea ko e kamata eni kenau toʻotoʻo mamalie atu ʻenau tokoni kae feingaʻi ketau lava ʻo tuʻu pe ʻia tautolu. Ko e meʻa ki he Pacific Forum ʻoku ʻikai ke kaunga ia ki heʻetau patiseti ka ʻoku mahino pe ʻoku ʻiai ʻa e fetokehekeheʻaki ai.

Kole fakamaʻalaʻala mei he Fakafofonga Nopele Ongo Niua kuo ne maʻu ha ʻimeili mei he ʻOfisi Hai Komisiona Nuʻusila ʻo fakapapauʻi mai ʻoku teʻeki ke confirm mai ha paʻanga tokoni ia mei he puleʻanga Nuʻusila. Meʻa e ʻa e Minisita Paʻanga ʻoku ʻosi fai pe ʻa e fengaueʻaki mo e ʻOfisi ko eni pea ko e fakaangaanga pe eni.
Fehuʻi mei he Fakafofonga Nopele ʻEua ʻoku hiki lahi ʻa e patiseti he taʻu ni pea ʻe anga fefe ai ketau fakapalanisi ʻa e patiseti? Kapau ko e feinga ke toʻo ʻetau falala mei he budget support ʻe anga fefe ke hoko ia kapau ʻoku fakaʻau pe ke lahi ange ʻa e patiseti. Meʻa ʻa e Minisita Polisi ko e ngaahi meʻa lalahi hange ko e sipoti ʻoku pau ke fakahoko ia pea ko e meʻa ia ʻoku lahi ai e patiseti.

Hoko atu meʻa ʻa e Palemia ʻoku fiemaʻu ketau foki ki he basic ke lava ketau hiko ʻetau veve kae lava ketau toki kaka fakasitepu mei ai. Fakatonutonu mei he Fakafofonga Nopele ʻEua ke lava fefe eni kae hili koia oku totongi ʻe he puleʻanga ʻa e kakai kenau hiko ʻa e veve. Hoko atu ʻa e meʻa ʻa e Palemia ʻoku ʻuhinga eni ia ki he fakaveve noaʻia ʻa e kakai. Kau ai mo e ngaahi vaka naʻe fakaveve ʻi tahi ʻa ia kuo ʻosi hiko ʻa e veve ko eni. ʻOku toe ʻa Havelu ke mau ʻalu ʻo hiko he feituʻu Commodities Board.
Meʻa ʻa e Fakafofonga Nopele Fika 2 Vavaʻu ʻo poupou ki he Palemia. ʻOku fai ʻa e ʻaʻahi ʻauhu ʻi Talasiu pea ʻoku ou poupouʻi. Kau ia he meʻa ʻoku ou fehuʻia, ko e fale naʻe kei sai pe ʻi mui ʻi he Post Office naʻe kei saipe kae hae ia ka naʻe hoko ko e tauʻanga meʻalele. ʻOku fiemaʻu ke fakatokangaʻi ʻa e ngaahi ngaue pehe. Meʻa ʻa e Palemia ko e fehalaaki ia naʻe hoko ʻo hae kotoa ʻa e fale ia kae ʻikai tuku pe ʻa e fale naʻe totonu pe ke tuʻu pe ia pea ʻoku fai ʻa e kole fakamolemole ai. Naʻe fai mo e vakai ki he ʻapi ʻo Tonga ʻi ʻApia pea ʻe fai ʻa e ngaue ki ai ke ngaahi ia mo tauhi.

Hoko atu ʻa e meʻa ʻa e Fakafofonga Nopele Fika 2 Vavaʻu fekauʻaki mo e paʻanga koeʻuhi ko e faʻa meʻa ʻa e Palemia ko e ʻaho 1 ʻo Siulai ʻe kamata ai ʻa e ngaue ʻa e puleʻanga ko eni. ʻOku ʻi ai ʻa e tokanga ki he ngoue ʻo hange ko ʻene ha he peesi 38 mo e 39 ʻo e Fakamatala Patiseti. ʻOku ʻasi ai ʻa e ivi malohi ʻo e kau ngoue. Ko e ha ʻoku ʻikai fakamaloʻiaʻi ai ʻi he patiseti ko eni ʻa e kau ngoue lalahi ko eni ʻi he hina. Fiemaʻu ke fakafaingofuaʻi ʻa e paʻanga no e puleʻanga ki he kau ngoue. ʻI ai mo e tokanga ki he palakalafi 5.3.2.2 peesi 45 fekauʻaki mo e keliʻanga koloa mo e maka pe ʻoku ʻuhinga ia ki he ha. ʻI ai mo e tokanga ki he hiko veve kae pehe ki he vai mo e ʻuhila.

FALE ALEA

Toloi ʻa e Fale Alea ki he 10am, Tusite 9 Sune 2015.

Go to top