‘AHO TUSITE, 9 ‘O SUNE 2015
10:00AM

FALE ALEA ‘O TONGA

1. LOTU – FAKAFOFONGA HAʻAPAI 13 (HON. VEIVOSA LIGHT OF LIFE TAKA)

2. TALI UI

3. ME’A ‘A E ‘EIKI SEA ‘O E FALE ALEA

KOMITI KAKATO

4. LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015); FAKAMATALA PATISETI 2015/2016; FAʻUNGA PALANI LANGA FAKALAKALAKA ʻA TONGA 2015-2025; PALANI FAKAPOTUNGAUE 2015/2016

Meʻa ʻa e Fakafofonga Nopele Fika 2 Vavaʻu ʻo kole ha fakamaʻalaʻala mei he Puleʻanga pe ko e ha ha uesia ʻo e langa fakalakalaka ʻi he keli maka koloa. Kole aipe ke fakaha mahino mai pe ko e ha ʻa e “impact” totonu ʻoku nau meʻa ʻe hoko he palani fakalakalaka ko eni. Naʻe ʻi ai mo e meʻa ʻa e Minisita Paʻanga he Pulelulu kuoʻosi ʻe fai ʻa e hiki vahenga pea naʻe ʻiai ʻa e meʻa ʻa e Minisita Paʻanga ʻoku ʻikai ke poupou kiai. ʻOku ʻikai totonu ke kau ʻa e Houʻeiki Memipa ʻo e Fale Alea he hiki ko eni he ʻoku ʻosi ʻiai honau vahenga mo e ngaahi monuʻia, pea ʻe ongosia ʻa e kakai ʻo e fonua he hiki ʻa e tukuhau kae lava ʻa e hiki vahenga ko eni. ʻI ai mo e tokanga ki he teu hiki ʻo e “departure tax”, ʻoku kau ai ʻa e pēpeé? Tali ʻe he Minisita Paʻanga ko e taʻu 12 ki lalo ʻoku ʻikai ke nau kau ai.

Tokoni mei he Minisita Ngaahi Ngaue Lalahi fekauʻaki mo e uesia ʻa e hiki ko eni ʻa e patiseti pea mo e hiki ʻa e tukuhau ʻi malaʻe vakapuna. ʻOku moʻoni ʻe ʻi ai ʻa e uesia ka ʻe ʻi ai mo e tupulekina he ngaahi tafaʻaki kehekehe. Kae kapau ʻoku fie fokotuʻu mai ʻe he Fakafofonga Nopele ha fakakaukau foʻou ke fakapaʻanga ʻaki ʻa e Sipoti pea fokotuʻu mai.

Hoko atu e meʻa ʻa e Fakafofonga Nopele Fika 2 Vavaʻu ko eni kuo meʻa mai ʻa e Minisita Ngaahi Ngaue Lalahi ʻe ʻi ai ʻa e uesia. ʻOku ʻikai ke fiemaʻu ia ke ʻi ai ha uesia.
Tokoni mei he Fakafofonga Haʻapai 13 kapau ʻoku ʻi ai ha hohaʻa ki he uesia kakai e fonua. Fefe ke taʻofi ʻa e Sipoti ko ʻeni? Ko e paʻanga te tau fakamoleki ko e paʻanga lahi ka ko e ha ha meʻa ʻe maʻu ai? Tau tokanga tautolu ki he ʻakapulu mo e ngaahi sipoti kehe.

Hoko atu e meʻa ʻa e Fakafofonga Nopele Fika 2 Vavaʻu ko ʻene tokanga ʻaʻana ki he hiki vahenga. ʻOku totonu ke toki fai ʻe he Fakafofonga ko eni haʻane fokotuʻu pehe.
Meʻa ʻa e Minisita Polisi ko e hiki vahenga naʻe fokotuʻu he 2011 pea naʻe ʻi ai ʻa e Remuneration Authority naʻa nau fai ʻa e ngaue pea ko e ola eni ke fai ʻa e hiki vahenga ko eni he 1 Siulai 2015. Meʻa ʻa e Fakafofonga ke ʻoua ʻe kau ai ʻa e Houʻeiki Memipa. Ka ko e ngaue ʻa e Maʻu Mafai Vahenga naʻe fakalukufua pea ko hono fakahoko eni ʻo e fokotuʻu ko ia.

Hoko atu ʻa e meʻa ʻa e Fakafofonga Nopele Fika 2 Vavaʻu ʻe faingataʻa ke taʻofi ʻa e Sipoti he ʻe toe fai ʻa e liliu lahi ki he patiseti. Pea ko e meʻa koi a ko e Puleʻanga pe ʻoku ngofua ken au fakahoko. ʻOku ʻi ai mo e tokanga ki he to lalo ʻa e Potungaue Ngoue he ʻoku ha mahino pe heni. Ko e hiki ko eni ʻa e patiseti meimei 27m pea ʻoku totonu ke fakasiʻisiʻi ʻa e ngaahi fakamole ʻo hange ko e folau ʻoku 9m. Kuo pau ke kumi e paʻanga ke maʻu ʻa e vahevahe taau mo e pule lelei hange ko e meʻa ʻa e Palemia, ka ʻe ʻikai maʻu e pule lelei ia he meʻa ko eni. Peesi 113, ʻoku pehe ʻoku 1% ʻa taʻemaʻungaue ka ʻoku ou fokotuʻu atu ʻoku hala ʻa e fika ko ia.

Meʻa ʻa e Minisita Tanaki Paʻanga ka ʻi ai ha mahaki ʻe fiemaʻu ke ʻoange ki ai ha faitoʻo ke lava ʻo moʻui pea ʻoku natula pehe ni ʻa e patiseti ko eni. ʻOku fakamaloʻia ʻa e puleʻanga kuo toki ʻosi pea ko e Palemia ʻo e ʻaho ni ʻoku lotolahi ʻa e Palemia ke fakaivia ʻa e kakai. Hange ʻoku hanu ʻa e kakai he teu hiki e tute ka ʻoku fakaʻamu ke fakamahino ko e sikaleti mo e ʻolokaholo ʻoku fili ʻa e kakai pe tenau maʻu pe ʻikai. Kuo pau ke tau kai ʻa e mā ʻi he kakava.
Fakatonutonu mei he Fakafofonga Nopele Fika 2 Vavaʻu ko e patiseti ko eni ʻe ʻikai ke tafi pupuha ʻa e kakai he ʻe fakasisina e kakai he patiseti ko eni. Pea ʻoku teu fai mo e hiki $150,000 ki he ngaahi vahenga ʻo kau ai ʻa ʻEua ka ʻoku ʻikai totonu ke kau ai ʻa ʻEua.

Hoko atu meʻa ʻa e Minisita Tanaki Tukuhau ʻe ʻikai ko e fakasisina he ko e fakamalohi ia pea ko e fonua tauʻataina eni. Ko e hiki vahenga ko e ngaue ia ʻa e Mau Mafai Vahenga pea ʻoku fakatefito ia he ngaue ʻoku fai ʻe he tokotaha ngaue. Kuo teuteu ʻa e Puleʻanga ki ai ʻa ia ka tali ʻa e hiki ko eni ʻoku ʻosi ʻi ai pe hono paʻanga. Ko e ola koia ʻo e tupu fakaʻekonomika ʻoku hohaʻa ki ai ʻa e Fakafofonga Nopele. ʻOku ʻi he Palani Fakalakalaka ʻa e ngaahi fokotuʻutuʻu ngaue.

Fehuʻi mei he Fakafofonga Haʻapai 12 ki he Minisita Tanaki Tukuhau. Fakatonutonu ʻa e Minisita Ngaahi Ngaue Lalahi ko e fakatonutonu pe kuo pau ke tali. Meʻa ʻa e Sea Komiti Kakato ko e fehuʻi tokoni eni pea ʻoku loto pe ki ai ʻa e Minisita Tanaki Tukuhau. Hoko atu e Fakafofonga ko e hiki e tukuhau te ne taʻofi ʻa e ʻinivesi ʻi he ʻekonomika. Tali ʻa e Minisita Tanaki Tukuhau ko e foʻi ʻaitemi ʻe 110K ʻi he Tariff pea kuo ʻosi feliliuaki ʻe he kau ngaue ke ʻoua naʻa uesia ai ʻa e kakai. Ko e meʻa ki he Sipoti ʻoku fakaʻofoʻofa ʻa e fokotuʻu mai ia ke taʻofi. Ka ko e fakakaukau eni ʻa e puleʻanga motuʻa ʻoku mau feinga ke teke pe ke fakahoko. Ko e $1 ʻoku ʻinivesi he sipoti ʻe fakafoki mai ai ʻa e $15. Ko e fika totonu ena pea ʻoku ʻi ai ʻa e tokanga ki he faʻa meʻa ʻa e Fakafofonga Nopele Fika 2 ʻo Vavaʻu ki he fika totonu he ko e fika totonu eni. Fakatonutonu ʻa e Fakafofonga Nopele Fika 2 Vavaʻu ko e kau sipoti ko eni tenau nofo holo nautolu ʻikai nofo hotele.

Tokoni mei he Fakafofonga Haʻapai 12 ke fefe ke tukuange ʻa e tukuhau kae toʻo pe mei he tute koeʻuhi kae fakaʻaiʻai ʻa e kau ʻinivesitoa.

Meʻa ʻa e Minisita Tanaki Tukuhau ʻoku kehe pe ʻa e package ia ki he fakaʻaiʻai ʻo e ʻinivesi ʻo kau ai ʻa e Hotele Tanoa he ʻoku kau ai ʻa e taʻe tute he taʻu ʻe 10. Tokanga ʻa e Fakafofonga Nopele ʻEua ke fai mai hano fakamaʻalaʻala ʻo e tute ko eni maʻae Tanoa. Hoko atu ʻa e Minisita ʻe toki tali mai eni ʻe he Minisita Paʻanga. Fokotuʻu ʻe he Minisita Tanaki Tukuhau ke tali ʻa e Fakamatala Patiseti.

Meʻa ʻa e Sea Komiti Kakato ngali kuo ʻosi maʻopoʻopo ʻa e femeʻaʻaki he Fakamatal Patiseti he ʻoku nofo pe ʻa e femeʻaʻaki he kaveinga tatau pea ʻe toe ʻi ai pe ʻa e femeʻaʻaki he ngaahi meʻa tatau he ngaahi vouti. Tokanga ʻa e Fakafofonga Nopele ongo Niua ko e fakamatala patiseti ʻoku mahuʻinga. Meʻa ʻa e Fakafofonga Nopele ʻEua ko e Fakamatala Patiseti ko e polisi ia pea ko e patiseti fakaangaanga ko e ngaahi fika pe ia. Ka ʻoku mahuʻinga ʻa e Fakamatala Patiseti he ʻoku ʻi ai ʻa e fakakaukau ʻoku makatuʻunga ai ʻa e ngaahi fika he ʻu vouti. Meʻa ʻa e Minisita Ngaahi Ngaue Lalahi ko e Lao pe ʻa e patiseti fakaangaanga pea ʻe lava pe ke toe fai pe ha foki ki he Fakamatala Patiseti. Fakatonutonu mei he Fakafofonga Nopele ʻEua ko e tuʻutuʻuni ʻa e Fale ko hono fakapaasi pe ha meʻa ʻe ʻikai toe lava ha foki ki ai.
Fokotuʻu mei he Fakafofonga Fika 15 Vavaʻu he hoko atu ʻa e meʻa he Fakamatala Patiseti, pea toki hoko ki he Palani Fakalakalaka, pea toki fakaʻosi leva ki he ngaahi vouti.

Hoko atu ʻa e femeʻaʻaki ʻi he tuʻunga ʻo e ʻasenita ngaue ʻa e Komiti Kakato naʻe tuku hifo ko eni.

FALE ALEA (2pm)

Meʻa ʻa e ʻEiki Sea ʻo e Fale Alea ʻo fakamaʻalaʻala ʻa e tuʻunga ʻo e ʻasenita naʻe tukuhifo ki he Komiti Kakato fekauʻaki mo e patiseti mo e ngaahi fakamatala kehe naʻe tukuhifo fakataha mo ia. ʻE aleaʻi fakataha pea toki paloti fakalukufua ʻo tali pea toki tuku hake ki he Fale Alea. ʻOku ʻikai ke fakafika atu ʻa e ngaahi “bullet points” koeʻuhi ʻoku ʻataa pe ki he Sea Komiti Kakato ke aleaʻi fakataha pea toki paloti fakalukufua. Pea ʻoku ʻi ai ʻa e kole ke hoko atu e ngaue.

KOMITI KAKATO

Meʻa ʻa e Sea Komiti Kakato ke fakafoki ʻa e fokotuʻu ke paloti ʻa e Fakamatala Patiseti kae toki palotiʻi fakataha pe ʻa e ngaahi meʻa kotoa ʻe tolu ko eni ko e ʻelemeniti ʻo e Lao Fakaangaanga Patiseti. ʻOku ʻataa pe ke aleaʻi fakataha pe ʻa e ngaahi ʻelemeniti ko eni. Fakafoki ʻe he Minisita Tanaki Tukuhau ʻene fokotuʻu. Meʻa ʻa e Minisita Ngaahi Ngaue Lalahi ko e Lao Fakaangaanga ko eni ʻoku hange pe ko e ngaahi Lao Fakaangaanga kehe pea ko e fakamatala fakamahino ko e ʻomai pe ke tokoni ki he femeʻaʻaki.

Hoko atu e femeʻaʻaki ʻi he Fakamatala Patiseti.

Meʻa ʻa e Fakafofonga Nopele Niua fekauʻaki mo e peesi 48 ʻo e Fakamatala Patiseti ʻa ia ʻoku ʻi ai ʻa e kalafi 5.3.3.2. pea mo e fiemaʻu ke fakaʻaiʻai ʻa e takimamata mo e folauʻeveʻeva. ʻI he peesi 113, ʻoku ʻi ai ʻa e fakamatala fekauʻaki mo e tokoni ki he fefonongaʻaki ki he ongo Niua pea ʻoku ʻi ai ʻa e fakamalo ai. ʻI ai ʻa e tokanga ki he Toutai mo e fokotuʻu ki he Puleʻanga ke uki mai muʻa ʻa e sekitoa ko eni ke tokoni ki he maʻuʻanga paʻanga ʻa e fonua. ʻI ai foki mo e tokanga ki he fakahoko totonu ʻo e fatongia ke fakaʻefika pea fakafepakiʻi ʻa e faihala.

Meʻa ʻa e Fakafofonga Fika 9 ʻo tokanga ki he ako ʻo hange ko e fakamatala he peesi 76 mo e 77. Naʻe ʻi ai ʻa e hohaʻa ki he peseti ʻe 98.2 [Tepile 5-13] ʻi he tuʻunga ʻo e laukonga mo e founga naʻe fai ʻaki hono sivi pe tesi ʻo e “literacy” pe laukonga. ʻI ai ʻa e fakamaloʻia ʻa e fokotuʻu e ngaahi ako lotoloto ʻa e Puleʻanga ke fakaʻau e ako ki he kakai ke aʻusia ʻa e taʻu ako fakamalohi ʻo fakatatau ki he lao. Kole naʻa lava ke toe ʻi ai ha ʻofisa maʻu ako ke ne fakapapauʻi ʻoku ʻalu ʻa e fanau ki he ako. Fakatonutonu mei he Minisita Ngaahi Ngaue Lalahi ko e Lao Ako 2013 ʻoku kei ʻasi pe ʻa e tuʻunga ʻo e ʻofisa maʻu ako ka ko e toe pe ke fakahoko ʻa e kupuʻi lao koia. Hoko atu ʻa e meʻa ʻa e Fakafofonga kae meʻa ʻa e Palemia ko e policy ko eni ʻoku lolotonga ʻi ai pe. Ka ʻoku ʻikai ke lava ʻo fakahoko lelei pea ʻoku moʻoni pe ia. ʻOku fai foki mo e ngaue ke review ʻa e ngaahi policy ko eni. Kapau ʻoku pehe ʻoku hala ʻa e policy pea ʻoku lelei pe ke fai mai ha fokotuʻu ha founga ke liliu ai ʻa e policy. Hoko atu ʻa e meʻa ʻa e Fakafofonga ʻoku ʻikai ʻuhinga pehe ʻa e fakamalanga ke fai ha kaunoa. Tokoni mei he Fakafofonga Fika 4 ʻoku tokolahi ʻa e niʻihi ʻoku tuʻutuʻuni he lao ke nau ako ka ʻoku ʻikai ha lau pau pe ko hai te ne totongi ʻenau ako? ʻOku fakalongolongo ʻa e lao he tuʻunga koia. Meʻa ʻa e Palemia ko e Lao ko e ako taʻetotongi.

Meʻa ʻa e Fakafofonga Nopele Fika 3 Tongatapu fekauʻaki mo e peesi 88, 6.2.1 poini fika 8 ʻa ia ko e Pangike Pule. Ko e ha ʻa e tuʻunga ʻo e ngaue ko eni ki he ngaahi pangike mo e lahi ʻo e totongi tupu mo e fees ʻoku nau hilifaki ki he kakai e fonua. ʻOku fakatefito eni ki he effective rate ki ha no ʻa ha taha mei he pangike. ʻI he peesi 72, Tepile 5-9 ʻoku ʻi ai ʻa e tuʻunga totonu ʻo e totongi tupu pea ʻoku ʻi ai ʻa e effective rate ko e peseti ʻe 13.4% mo e 21.06%, ʻi hono fakafehoanaki e tuʻunga ko eni ki he no fale mo e no taautaha, ʻoku na faikehekehe lahi, koeʻuhi ko e tanaki ki ai ʻa e ngaahi totongi makehe. ʻA ia ʻoku makatuʻunga eni he liquidity ʻa ia ʻoku ʻi he pangike pule ʻo ʻikai tuku atu ki he kakai e fonua koeʻuhi ko e lahi e totongi tupu [effective rate]. ʻOku totonu ke regulate lelei ʻe he Pangike Pule ʻa e ngaahi pangike ke ʻoua fuʻu lelei ki ha tafaʻaki kae kovi ki he kakai e fonua. Ka ko e fie ʻilo pe ko e ha ʻa e tuʻunga ʻo e ngaue ko eni.

Meʻa ʻa e Minisita Paʻanga ko e totongi tupu he pangike ʻoku 2, pea ko e tuʻunga ena e totongi interest he no he tepile 5-9. Pea ʻoku fai pe ʻa e kole ke fai ha fengaueʻaki mo e pangike ʻi he tafaʻaki ko eni pea ngalingali ʻoku aʻu ki ha tuʻunga ʻoku mateuteu e pangike ken au holo hifo. Ka ʻoku ʻikai ke pule ki heni ʻa e Pangike Pule he ʻoku tuʻunga pe ia he feʻauʻauhi ʻa e ngaahi pangike. Ka ʻoku fakatokangaʻi eni ke fai ha ngaue ki ai mo e Pangike Pule.

Meʻa ʻa e Minisita Paʻanga fekauʻaki mo e hiki $9m ʻa e totongi folau, ka ko e 9m he peesi 7 ko e fakalukufua ia ki he fefonongaʻaki mo e fetuʻutaki ʻa ia ʻoku ʻikai ke fekauʻaki p emo e folau ka ʻoku kau ai e totongi telefoni etc. Peesi 45 naʻe ʻi ai e tokanga ki he keli koloa pea fakamaʻalaʻala mai ʻe he Minisita Paʻanga. Ko e tokanga koia ki he Hotele, ko e ngaue ke ʻalu hake ʻo fetuʻu 4, ʻa ia ʻoku ʻiai ʻa e meʻa kuo pau ke tau ʻoatu kae lava ken au ʻomai ha meʻa. Ko e fakaʻataa he taʻu ʻe 15 mei h tut emo e CT mo e excise ki he koloa lalahi ki he langa, ʻa ia ʻe lele pe he taʻu ʻe 2 e fakaʻataa ko eni ke fai e langa pea toki fakahoko aipe ha fakaataa ʻi loto he taʻu ʻe 15 kapau ko e ʻai ki he koloa lalahi ke fakalahi ʻaki e hotele. Ko e fengaueʻaki mo e ngaahi fonua muli ʻoku lelei pe kia tautolu pea mo nautolu fakatouʻosi.

Kole ʻa e Fakafofonga Nopele Fiha 2 Vavaʻu ke fai mai ha fakamaʻalaʻala ʻa e Minisita Paʻanga fekauʻaki mo e to hina. Ko e to hina he taʻu kuo ʻosi ko e tokonima pe naʻa nau omai ʻomau fakataha. Pea naʻe ʻosi toe fai mo e fakataha ke fai ha femahinoʻaki. Tokoni ki ai ʻa e Minisita Tanaki Tukuhau ko e paʻanga no ʻoku ʻave ki he pangike ʻoku ʻi ai hono ngaahi criteria pea ʻe lava pe he puleʻanga ʻo liliu e ngaahi criteria koia. Ko e to hina he taʻu kuoʻosi naʻe ʻi ai ʻa e laʻa lahi pea ko e disaster ia pea ʻoku fai ʻa e fakakaukau ke tokoni ki he kau ngoue ko eni. Pea ʻoku lolotonga fai ʻa e ngaue ke lava ʻo hu ʻetau hina ki Siaina.

Meʻa ʻa e Fakafofonga Nopele ʻEua ʻoku ʻi ai ʻa e tohi tangi fekauʻaki mo e exporter hina. ʻOku fokotuʻu atu ke fai mo fakahu mai ʻa e tohi tangi. Tokoni mei he Minisita Paʻanga kuo ʻosi solova ʻa e palopalma ko eni mo e exporter. Hoko atu meʻa ʻa e Fakafofonga Nopele ʻEua ko e tohi tangi ia ʻoku totonu ke ʻomai ia ki heni. Pea ka ʻomai ha tohi ʻo fakapapauʻi mai ʻa e meʻa ko ia kae fakaha ki he kautaha. Meʻa ʻa e Fakafofonga Fika 15 ko e tohi tangi ko eni naʻe fakahu ange ki he Komiti ke fai hono vakaiʻi pea ʻoku fakatatali eni ki he lipooti ʻa e Komiti ke maau kae fakahu mai. Ka ʻoku ʻosi ʻi loto pe meʻa ʻoku tokanga ki ai ʻa e tohi tangi ʻi he tali ko eni kuo ʻomi ʻe he Minisita Paʻanga.
Meʻa ʻa e Fakafofonga Fika 4 pe ko fe ʻa e tohi tangi koia ke ʻomai muʻa ʻa e tohi tangi ketau tali ʻaki. Meʻa ʻa e Sea Komiti Kakato ʻoku ʻikai hano mafai he ʻoku ʻi he Sea Fale Alea ia ʻo e Fale Alea. Kole ʻa e Minisita Paʻanga ko e talanoa naʻe fai ʻi tuʻa ia pea ko e kole ke hoko atu ia ke fai ha femahinoʻaki. Hoko atu meʻa ʻa e Fakafofonga Nopele ʻEua ʻoku lahi e maketi ia ka ʻoku teʻeki fai ha ngaue ʻa e Puleʻanga ke fakaava ʻa e matapa ke hoko ia. Fakatonutonu mei he Minisita Tanaki Tukuhau ʻoku lolotonga fai ʻa e ngaue kiai ʻa e Puleʻanga. Hoko atu e meʻa ʻa e Fakafofonga Nopele ʻEua ko e patiseti ʻoku hiki ʻaki e $3000 ko e ha ha meʻa ʻe lava ai? Meʻa ʻa e Minisita Paʻanga ko e $300K pea ko e meʻa ia he patiseti.

Hoko atu ʻa e meʻa ʻa e Fakafofonga Nopele ʻEua ʻo tokanga ki he ngaahi pisinisi muli ʻi Tonga ʻo hoko ʻo mate ai ʻa e ngaahi pisinisi Tonga. Meʻa ʻa e Minisita Tanaki Tukuhau kuo pau ketau tali ʻa e kakai ko eni ko e konga kinautolu ʻo e sosaieti.

Meʻa ʻa e Fakafofonga Fika 15 ʻoku moʻoni ʻa e tokanga ki he kau pisinisi Tonga ka kuo pau ke fakahoko ia fakatatau ki heʻetau lao. Ka ʻe fai pe ʻo fakatatau ki hotau ivi ka ʻoku ʻikai ʻuhinga ia ke tau taʻofi ke ʻoua toe haʻu ha taha ia ʻo ngaueʻi e fonua. Fokotuʻu ki he Minisita Paʻanga ha founga ʻe lelei ange. Ko e taimi ʻoku feinga ai kau ngoue ke no, kuo pau ke ʻai ha meʻa maluʻi ka ʻoku ʻikai faʻa maʻu. Fiemaʻu ke fakaivia tangata toutai mo e tangata ngoue ke lava ke fai hano ngaueʻi e fonua. Fefe kapau ʻe vaheʻi ha paʻanga ʻo tuku he pangike ke maluʻi ʻaki ʻa e ngaahi no ko eni.

FALE ALEA

Fakaangaanga ke lele poʻuli ʻa e Fale Alea he Pulelulu 10 Sune mo e Tuʻapulelulu 11 Sune.

TOLOI ʻA E FALE ALEA KI HE PULELULU 10 SUNE, TAIMI 10:00AM.

Go to top