‘AHO TUʻAPULELULU, 11 ‘O SUNE 2015
10:00AM

FALE ALEA ‘O TONGA

1. LOTU

2. TALI UI

3. ME’A ‘A E ‘EIKI SEA ‘O E FALE ALEA

Meʻa ʻa e ʻEiki Sea ʻo kole ha fakamaʻalaʻala mei he Palemia pe ʻoku fakahoko ha siupeli ʻi he hilifaki Kalauni ko eni.

Meʻa ʻa e Palemia ʻe toki ʻomai ʻe he Minisita Polisi ʻa e tali fekauʻaki mo e siupeli. Hoko atu ʻene meʻa ʻoku fiemaʻu ʻa e teuteu lahi ki he hilifaki Kalauni pea mo ʻai ke fakaʻofoʻofa ʻa loto Nukuʻalofa. Kole ki he kakai kae tautefito ki he kau ʻOfisakolo mo e kau Pule Fakavahe kenau tokoni mai ki hono fakamaʻa ʻa e ngaahi kolo. Ko e vahenga Kolomotuʻa kuo nau ʻosi tukupā ke ngaahi ʻo maʻa pea ʻe haʻelea ʻe he ʻEne ʻAfio ʻapongipongi.

Meʻa ʻa e ʻEiki Sea ʻo tokanga ki he ʻikai ke meʻa ʻi heni ʻa e Minisita ki he Ngaahi Ngaue Fakalotofonua. Kole fakamolemole mei he Palemia.

4. KOMITI KAKATO

4.1 LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015); FAKAMATALA PATISETI 2015/2016; FAʻUNGA PALANI LANGA FAKALAKALAKA ʻA TONGA 2015-2025; PALANI FAKAPOTUNGAUE 2015/2016

Meʻa mai ʻa e Fakafofonga Nopele Fika 1 Haʻapai ʻo Sea Komiti Kakato Leʻoleʻo. Meʻa ʻa e Sea Leʻoleʻo ʻe hoko atu e femeʻaʻaki he Vouti 2 pea ʻe toki paloti fakaʻangataha pe he fakaʻosinga ʻa e femeʻaʻaki ʻo e ʻaho ni.

Ko e tohi tangi fika 3,4,6/2015 ʻe aleaʻi fakataha ia mo e Vouti ʻa e Potungaue Paʻanga.

Ko e tohi tangi fika 8/2015 ʻe aleaʻi fakataha ia mo e Vouti ʻa e Potungaue Moʻui.

Ko e Palani Fakaangaanga Fakataʻu 2015/2016 ʻa e ʻOfisi ʻAtita Seniale ʻe aleaʻi fakataha ia mo e Vouti ʻa e ʻAtita.

VOUTI 2 – FALE ALEA

Meʻa ʻa e Fakafofonga Nopele ʻEua ʻo tokanga ki he vahenga ʻa e Houʻeiki Memipa Fale Alea mo e founga hono vaheʻi, ʻa ia ʻoku vahe tatau pe ʻi he tapuni ʻa e Fale mo e taimi ʻoku ʻikai ke ngaue ai ʻa e Fale. Fokotuʻu ke liliu e founga ke toki vahe pe Houʻeiki ʻi he taimi ngaue ʻa e Fale Alea. ʻOku fakahoko mai ʻoku fakatonuhiaʻi e founga lolotonga koeʻuhi ko e ngaahi fakataha Komiti, ka ʻoku vahe pe foki ʻa e Komiti ia. Meʻa ʻa e Fakafofonga Nopele Fika 3 Tongatapu ko e feinga eni ke aʻu ki ha tuʻunga ʻoku tau ngaueʻi ʻa e foʻi mahina ʻe 12 pea ko e ʻuhinga ia e ʻu Komiti Fale Alea, mo e ʻaʻahi ki he vahenga mo e ngaahi fatongia pehe ʻo hange ko e ngaahi Fale Alea kehe ʻi he Kominiueli. ʻOku ʻi ai pe ʻa e vahe ia ki he fakataha Komiti ka ko e fanga kiʻi allowance kehe pe ia. Meʻa ʻa e Fakafofonga Fika 15 ko e founga motuʻa naʻe fakaleleiʻi ia ʻo tau hoko mai ai ki he founga ʻo e ʻaho ni. Naʻe faʻo katoa ʻa e ʻovataimi mo e ngaahi monuʻia kehe ki he tefitoʻi vahenga he ʻaho ni.

Hoko atu Fakafofonga Nopele ʻEua ko e fokotuʻu ke vahe pe he taimi ʻoku ngaue ai ʻa e Fale Alea, ko e tokanga ke vakaiʻi e founga hono fai e vahe kae ʻikai ko e “lahi” pe “siʻisiʻi” ʻa e tuʻunga vahenga. Ko e founga ʻo e vahe tene fakangatangata ʻa e “lulu tava” naʻe pehē naʻe faʻa fakahoko he kuohili. Tokoni mei he Fakafofonga Fika 13 ʻoku totonu ke ʻuluaki toʻo ʻa e vahenga faka-Nopele ia ʻo e Fakafofonga Nopele kae toki vakai ki he vahenga ko eni. Tokoni ʻa e Minisita Polisi naʻe ʻuhinga ʻa e “lulu tava” ki he kuohili ʻi he kei vahe pe he ʻaʻahi ʻa kinautolu naʻe ʻikai ke kau ʻi he ʻaʻahi.

Meʻa ʻa e Sea Komiti Kakato ʻoku mahino mai ko e fokotuʻu ʻa e Fakafofonga Nopele ʻEua ke siofi ʻa e founga, ka ko e fika ko eni he patiseti ʻe kei tuʻumaʻu pe. Fokotuʻu ʻe he Palemia ke ʻave ʻene fokotuʻu ki he Komiti Paʻanga pe ki ha Komiti.

Meʻa ʻa e Fakafofonga Nopele Fika 2 Vavaʻu tokoni ki he Fakafofonga Nopele ʻEua ko e konga lahi ʻo e ngaahi meʻa naʻe faʻa tokanga ki ai ʻa e Palemia he kuohili ʻoku aʻu ki ai ʻa e Fale Alea he ʻaho ni. Ko e Houʻeiki Memipa mo honau vahenga ʻoku fakafuofua ʻi he levolo 5 pea ʻoku faʻa fanongoa pe ʻa e faʻa hanu ʻa e Houʻeiki he siʻisiʻi ʻenau vahe. Ko e tapuaki eni ia ʻo e tuʻunga ko eni. ʻIkai poupou ki he fokotuʻu ʻa e Fakafofonga Nopele ʻEua pea fokotuʻu atu ke tali ʻa e Vouti mo kole ki he ʻEiki Sea ʻo e Fale Alea ke ʻoua ʻe fakatokosiʻi ʻa e siʻi kau ngaue sekiuliti mo e kau feiʻilo kae siofi ʻa kinautolu mo honau ngaahi fuʻu vahe lalahi.

Meʻa ʻa e Fakafofonga Fika 4 ʻo poupou ke ʻave ʻa e fokotuʻu ʻa e Fakafofonga Nopele ʻEua ke ʻave ia ki he Komiti Paʻanga.

Hoko atu ʻa e Fakafofonga Nopele ʻEua ki he paʻanga vahe ki he ngaahi vahenga naʻe fokotuʻu ke fakalahi. Meʻa ʻa e Minisita Paʻanga ko e paʻanga ko ia ʻoku ʻi he vouti ia ʻa e Fale Paʻanga.

Fakamaʻopoʻopo ʻe he Fakafofonga Nopele ʻEua ʻene fokotuʻu ke vakaiʻi:

1. Founga vahenga ʻa e Houʻeiki Memipa (ke toki vahe pe he taimi ʻoku fakataha ai ʻa e Fale Alea)
2. Fakalahi e paʻanga tokoni ki he ngaahi vahenga (naʻa lava hiki ki he 200,000)
3. Siʻisiʻi ʻa e Vouti ʻa e Fale Alea fakatatau ki he fatongia ki he fonua, ʻaki ha feʻunuʻaki fakalotoʻi potungaue.

Meʻa ʻa e Sea Komiti Kakato ko e konga 1 ʻo e fokotuʻu ʻe toki fokotuʻu ia ʻe he Fakafofonga Nopele ki he ʻEiki Sea hili ha paasi ʻa e Vouti ʻa e Fale Alea. Pea fiemaʻu ke ʻomai ha fika kapau ko e ʻuhinga ki he vouti ke hiki pea ʻomai ha hiki pau ki he hiki koia.

Tali ʻa e Vouti 2, teʻeki ke paloti, toki paloti fakalukufua.

VOUTI FIKA 3 - ʻOFISI ʻATITA

Aleaʻi fakataha mo e Palani Fakaangaanga Fakataʻu.

Meʻa ʻa e Fakafofonga Nopele Fika 3 Tongatapu (ʻEiki Sea ʻo e Fale Alea) ʻo fakamaʻalaʻala ʻa e Vouti mo e Palani Fakaangaanga. Fakahoko mai aipe kuo maau e ngaue ke fokotuʻu ʻa e tokotaha ki he lakanga ʻAtita Seniale.

Meʻa ʻa e Minisita Tanaki Paʻanga Tukuhau ʻoku ngali kiʻi holo pe ʻa e vouti ka ko e aʻu ia ki he “full capacity” ʻo e ʻOfisi. Fokotuʻu ke tali ʻa e Vouti.

Fehuʻi mei he Fakafofonga Nopele Fika 2 Vavaʻu, peesi 80, vahenga ki he $73,900. Ko e vahenga ia ʻAtita Seniale mo ʻene sekelitali.

Tali ʻa e Vouti 3. Teʻeki paloti, toki paloti fakaʻangataha.

PALOTI ʻA E PALANI FAKAANGAANGA 2015/2016 ʻO TALI 20/0.

VOUTI FIKA 4 – KOMISONI KI HE VA MO E KAKAI

Meʻa ʻa e Fakafofonga Fika 4 ʻoku hiki ʻa e patiseti. ʻE lava ke fakamaʻalaʻala mai mei he puleʻanga pea ko e tokotaha pe ʻa e fakatotolo ʻa ia ʻoku fuʻu tokosiʻi. ʻOku totonu ke fai ha tokangaekina ʻo e ʻisiu ko eni.

Meʻa ʻa e Minsita Lao kuo ʻosi fili ʻa e Komisiona ki he Va mo e Kakai kae pehe ki hono CEO. Ko e Komisoni ki hono Tauʻi e Faihala ʻoku teʻeki ke fili ki ai ha taha neongo naʻe ʻosi fai mai ʻa e ngaahi ngaue ʻo feinga ke fakanofo ha taha ki he lakanga ko eni. Naʻe ʻi ai ʻa e fakatonutonu ki he Lao ki he Komisiona ki he Fakafepaki ʻo e Faihala ʻi he taʻu kuo ʻosi ka naʻe ʻikai ke fakamoʻoni huafa ki ai ʻEne ʻAfio. Meʻa mai ʻa e Palemia ʻoku ʻosi fai ʻa e kole ki he Fakataha Tokoni ken au fai ʻenau tolu hono fili mai ʻa e lakanga koia.

Fehuʻi ʻa e Fakafofonga Nopele ʻEua pe ʻe ʻikai lava ke fakahoko pe ʻe he tokotaha, kapau ko e Ombudsman, ʻa e ngaue ʻa e ongo Komisiona fakatouʻosi. Meʻa ʻa e Palemia ʻo fakamaʻalaʻala ʻa e faikehekehe ʻo e natula e ongo lakanga mo e ngaue ke na takitaha fakahoko. Meʻa ʻa e Fakafofonga Fika 4 ko e ʻisiu ke fakahoko ʻa e fakanofo ʻe ha sino ʻoku tauʻataina ke ne fakahoko ʻa e fakanofo.

Tali ʻa e Vouti 4. Teʻeki paloti, toki paloti fakaʻangataha.

VOUTI FIKA 5 – POTUNGAUE NGAAHI NGAUE KI MULI & FEFAKATAUʻAKI

Meʻa ʻa e Fakafofonga Nopele Fika 1 Tongatapu ʻoku totonu ke fakaʻasi mai mo e ngaahi assets ʻa e ngaahi ʻofisi Tonga I muli he patiseti ʻo kau ai ʻa e tuʻunga mahuʻinga hotau ngaahi ʻapi ʻi muli. Meʻa ʻa e Palemia ʻo fakamaʻalaʻala ʻa e tuʻunga ʻoku ʻi ai ʻa e ngaahi ʻapi ʻo Tonga ʻi he ʻu fonua muli.

Meʻa ʻa e Minisita Ngaahi Ngaue Lalahi fekauʻaki mo e kakai Tonga nofo muli mo e fiemaʻu ke tokangaekina ʻenau ngaahi fiemaʻu hange ko e kole visa. Meʻa ʻa e Minisita Tanaki Paʻanga Tukuhau ʻoku fai ʻa e ngaue ke ʻomai ʻa e kole visa hange ko e visa ʻAmelika ki Tonga ni. Ko e liliu pe he Potungaue ko eni ʻoku fekauʻaki ia mo hono tokangaʻi ʻo e border. Meʻa ʻa e Palemia ʻoku kei hoko atu e ngaue ʻo feinga ke ta ʻa e visa ʻAmelika ʻi Tonga ni.

Fokotuʻu mei he Fakafofonga Nopele Fika 3 ʻo Tongatapu ke tokangaʻi ange ʻa e faka-Tonga ʻoku ngaueʻaki he patiseti ki he “border” ʻoku ʻai heni ko e “muiʻifonua” kae hange ʻoku ʻikai ke tonu ia.

Meʻa ʻa e Palemia ʻoku ʻiai ʻa e fakakaukau ke fokotuʻu ha Fakafofonga Tonga ʻi Papua Niukini ke fakaʻaiʻai e fetuʻutaki mo e ngaahi fonua Melanisia. ʻOku fai ʻa e sio ki West Papua mo Vanuatu mo Solomone ke fai ha fengaueʻaki. ʻI ai mo e palani ke fokotuʻu mo e Fakafofonga ʻi Fisi. Hoko atu e femeʻaʻaki ki he totonu ʻa e kakai Tonga nofo muli mo liliu kakai muli ki he totonu ki he tangataʻi fonua Tonga. Hoko atu ʻa e femeʻaʻaki ki he ngaahi ʻapi ʻo Tonga ʻi muli.

Meʻa ʻa e Minisita Paʻanga ʻoku hiki ʻaki ʻa e 1.2m ʻa e vouti ko eni koeʻuhi ko e ngaahi fiemaʻu ke fakalelei ʻa e ngaahi ʻapi Tonga ʻi muli.

Tali ʻa e Vouti 5. Teʻeki paloti, toki paloti fakaʻangataha.

VOUTI FIKA 6 – KAU TAU ʻA ʻENE ʻAFIO

Meʻa ʻa e Minisita ki he Kau Tau ʻa ʻEne ʻAfio ʻo fakamaʻalaʻala ʻa e vouti.

Fehuʻi ʻa e Fakafofonga Nopele Fika 2 Vavaʻu pe ko e ha ʻoku fuʻu holo pehe ai ʻa e potungaue ko eni. Fakamaʻalaʻala ʻa e Minisita Tanaki Paʻanga Tukuhau ʻoku ʻikai holo e patiseti ka ʻoku hiki ʻaki ʻa e meimei paʻanga ʻe 1 miliona.

Tali ʻa e Vouti 6. Teʻeki paloti, toki paloti fakaʻangataha.

FALE ALEA

ʻE vava pe ʻa e toenga patiseti ka ʻoku totonu pe ketau kiʻi lele atu pe ki he uike kahaʻu ke mahino pe ʻoku mahuʻinga. Ko e tohi tangi ʻe ua ʻoku tuku atu ki he Komiti Privilege kenau ngaue ki ai kae toki ʻomai ke aleaʻi fakataha mo e ngaahi vouti koia. Kole mei he Palemia ke tau toe lele pe muʻa ki he 6pm.

TOLOI ʻA E FALE ALEA KI HE MONITE 15 SUNE 2015, TAIMI 10:00AM

Go to top