‘AHO MONITE, 15 ‘O SUNE 2015
10:00AM

FALE ALEA ‘O TONGA

1. LOTU – MINISITA POLISI

2. TALI UI

3. ME’A ‘A E ‘EIKI SEA ‘O E FALE ALEA

Meʻa ʻa e ʻEiki Sea ʻo e Fale Alea ʻo kole ki he Palemia ke fakahoko mai ʻi he tohi mei he Palemia ki he ʻEiki Sea ʻa e feliliuʻaki ko eni he Potungaue Takimamata. ʻOku fiemaʻu foki ke fakamahino mai pe kuo fai hano fakahoko ki Heʻene ʻAfio.

4. LIPOOTI FIKA 05/2015 KOMITI TUʻUMAʻU KI HE NGAAHI TOTONU ʻA E FALE ALEA (FEKAUʻAKI MO E TOHI TANGI FIKA 9, 10, 11/2015)

Meʻa ʻa e Sea ʻo e Komiti ʻo fakamaʻalaʻala ʻa e lipooti. Fokotuʻu mai ke lau ʻa e tohi tangi fika 9 mo e 11 ke lau ʻo aleaʻi fakataha mo e patiseti. Ko e tohi tangi fika 10/2015 ʻoku fokotuʻu atu ke toki aleaʻi ia ʻamui ange he taimi ngaue angamaheni ki he ngaai tohi tangi he ʻoku ʻosi ʻi ai ʻa e paʻanga pau ʻoku tuhuʻi mai ke vaheʻi mei ai hono fakapaʻanga ʻo e kole ko ia.

Lau ʻa e Lipooti.

Lau ʻa e tohi tangi fika 9/2015, fakaʻaho ki he ʻaho 4 ʻo Sune 2015, maʻu ʻi he ʻofisi ʻo e Fale Alea he ʻaho 10 ʻo Sune 2015, mei he Kau Pisinisi Takimamata ʻa Tonga ʻo Kole ha tokoni fakapaʻanga ke langa hake ʻa e sekitoa mo e ngaahi pisinisi faka-Takimamata ʻa Tonga ni, fakamoʻoni ki ai ʻa e toko 89.
Lau ʻa e tohi tangi fika 11/2015, fakaʻaho ki he ʻaho 12 ʻo Sune 2015, maʻu ʻi he ʻofisi ʻo e Fale Alea he aho 12 ʻo Sune 2015, mei he Kau Mamahiʻi Fonua ʻo Haʻapai ʻo kole ke vaheʻi ha $1m mei he patiseti ke no mei ai ʻa e kakai fefine ʻo Haʻapai mei he Paʻanga No ʻa e Puleʻanga.

Tukuhifo ki he Komiti Kakato ʻa e tohi tangi fika 9 mo e 11/2015.

5. KOMITI KAKATO

LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015); FAKAMATALA PATISETI 2015/2016; FAʻUNGA PALANI LANGA FAKALAKALAKA ʻA TONGA 2015-2025; PALANI FAKAPOTUNGAUE 2015/2016

Paloti ʻo tali ʻa e Vouti Fika 2, 3, 4, 5 mo e 6. 18/0.

VOUTI FIKA 7 - ʻOFISI ʻO E PALEMIA

Meʻa ʻa e Fakafofonga Nopele Fika 3 Tongatapu ʻo tokanga ki he hiki ʻaki ʻa e ofi ʻi he $200K naʻe hiki ʻaki ʻa e vouti ko eni he 2014/2015 he ʻoku fehangahangai ia mo e meʻa ʻa e Palemia ke fakasiʻisiʻi ʻa e fakamole. ʻOku toe hiki mo e patiseti ki he vahenga mei he fakafuofua ki he $800K ki he $1m. Ko e fakaʻamu pe he fakamahino mai pe ko e ha ʻa e ʻuhinga ʻo e hiki ko eni.

Meʻa ʻa e Minisita Tanaki Paʻanga Hu Mai ʻoku moʻoni e meʻa naʻe meʻa ki ai ʻa e ʻEiki Nopele pea koeʻuhi ko e hikihiki ʻa e koloa ʻoku ʻikai ha patiseti ʻe tuʻumaʻu. ʻOku hiki ʻaki ʻa e meimei $200K ke fakaivia fakakaungaue ʻa e ʻofisi he ko e Sekelitali Pule pe ʻi ai mo e kau kalake.

Meʻa ʻa e Fakafofonga Nopele Fika 3 pe ʻe lava ke tuku ke tali mai ʻe he Palemia pe Minisita Paʻanga ke na tali mai. Meʻa ʻa e Palemia ko e tali fakalukufua naʻe ʻoatu ʻe he Minisita Tanaki Paʻanga Hu Mai, ka ko e konga lahi ko hono fakatokolahi mai ʻa e kau ngaue he ko e ʻofisi ko eni ʻoku mahuʻinga pea fiemaʻu ke fakapapauʻi ko e kau ngaue lelei ʻi he ʻofisi he ko e feituʻu eni ʻoku tafe mei ai ʻa e ngaahi directions fakafonua. ʻOku moʻoni ʻa e fiemaʻu ke tutuʻu ʻa e fakamole ka ʻi he taimi tatau ʻoku fiemaʻu ke fakapapauʻi ʻa e tuʻunga lelei e kau ngaue.

Meʻa ʻa e Fakafofonga Nopele Fika 1 Tongatapu ʻo tokanga ko e ʻofisi eni ʻoku makatuʻunga ai ʻa e feliliuaki fakapolitikale. Ko e taha e ngaahi matavaivai ʻoku ʻasi mai he lipooti ʻa e ʻOfisi ko eni ko e ʻikai poupou lelei ʻa e kau Minisita ki he ngaahi fokotuʻutuʻu mei he ʻOfisi ʻo e Palemia. Fakatonutonu mei he Minisita ki he Ngaahi Ngaue Fakalofotonua ʻoku poupou ʻa e kau Minisita ki he fokotuʻutuʻu ngaue ʻa e ʻofisi ko eni. Hoko atu ʻa e meʻa ʻa e Fakafofonga Nopele ko e toʻo eni mei he Lipooti mei he ʻOfisi Palemia (Palani Ngaue, peesi 24). ʻOku ʻi ai ʻa e lave ai ki he kau mataotao ki he tafaʻaki Information pea ʻoku ʻi ai ʻa e hohaʻa pe ʻoku ʻikai feʻunga pe ʻa e kau consultant koia pea ko e angamaheni ko hono ʻomai e kau consultant ʻo fakafou mai he Potungaue Paʻanga. ʻI ai ʻa e manavasiʻi ki he tuʻunga ʻoku ʻi ai ʻa e ʻOfisi Palemia he taimi ni he ʻoku toumoliliu ʻo ʻikai lava ke tauhi (consistency) ʻo fakatatau ki he liliu puleʻanga. ʻOku kehe ʻa e ʻofisi ko eni he ʻaho ni mei he ʻaneafi he ʻoku fiemaʻu ʻe he Palemia ʻa e ngaahi meʻa kehekehe ka ʻikai lava ia ʻo fakapaʻanga ʻe he Minisita Paʻanga. ʻOku totonu ke tukuange pe ʻa e Palemia ia ke tauʻataina ki heʻene fili ʻene kakai.
Fehuʻi ʻa e Fakafofonga Nopele Fika 2 Haʻapai fekauʻaki mo e kupu 54 ʻo e Konisitutone fekauʻaki mo e fili ʻo e Kovana.

Meʻa ʻa e Palemia ko e mahino ki ai ʻa e meʻa ʻa e Fakafofonga Nopele ʻoku ʻikai fehokotaki lelei ʻa e puleʻanga ko eni mo e puleʻanga motuʻa. Pea ko e meʻa ia kuo pau ke hoko he ʻe hu atu ʻa e puleʻanga foʻou ia ʻo fakaleleiʻi ha matavaivai. Ko e kau ngaue kotoa ko eni ʻa e ʻOfisi Palemia ko e fokotuʻu atu pe ki he Minisita Paʻanga pea ne tali. Ko e ngaahi folau kuo lahilahi ʻene hoko pea ko e konga lahi e ʻu folau naʻe pau keu folau ai. Ka ʻoku moʻoni ʻoku totonu ke fakasiʻisiʻi ʻeku folau pea ʻoku ʻi ai ʻa e folau ʻe 9 mei he ʻaho ni ki Tisema ka ko e folau pe ʻe 3 teu lava atu ai. Ko e konga lahi ʻo e ʻu folau ko eni ʻoku makatuʻunga lelei pe hono fakahoko.

Hoko atu ʻa e meʻa ʻa e Fakafofonga Nopele Fika 1 o Tongatapu ʻo tokanga ki he fengaueʻaki ʻa e PSA mo e PSC ʻo makatuʻunga he ngaue naʻe fai he kuohili ʻe he Puleʻanga mo e Fale Alea ki he hiki vahenga ʻo iku tuku kituʻa ai ʻa e Palemia ʻo e ʻaho koia. ʻIai ʻa e ʻamanaki ka ʻi ai ha tokanga ke fai ha hiki vahenga pea fakahu mai ki he PSC mo e Potungaue Paʻanga pea mo e fiemaʻu ke ʻoua ʻe kau ʻa e kau ngaue fakapuleʻanga he meʻa fakapolitikale. Ko e tefitoʻi fakakaukau ia ʻoku totonu ke tauhi ʻi he ʻOfisi Palemia. ʻOku lelei pe foki ʻa e folau ʻa e Palemia kae fakapapauʻi pe ʻoku meʻa heni ʻa e Tokoni Palemia ia ke hoko atu e ngaue.

Meʻa ʻa e Fakafofonga Nopele Fika 2 ʻo fehuʻi fekauʻaki mo e $60,000 ʻoku ʻasi he peesi 5 ʻi he vouti ʻa e ʻOfisi Palemia. Pea ʻi he peesi 117 naʻe 17m ʻi he 2013/2014 pea holo ki he 2m ʻi he 2015/2016. Tali mei he Minisita Polisi ko e 1.8m mei he 2014/2015 ki he 2.2m he 2015/2016. Ko e 2013/2014 in kind ia ko e fakafuofua ia e tokoni mei muli he taʻu koia. Meʻa ʻa e Minisita Paʻanga ko e paʻanga ia naʻe fakapaʻanga ʻaki ʻa e taki ʻo e keipolo. Ko e 60,000 ko e paʻanga ia ki he hono fakakomipiuta ʻa e lekooti ʻa e ʻOfisi Palemia.

Meʻa ʻa e Fakafofonga Nopele ʻEua ʻo tokanga ki he founga fili ʻo e kau ngaue foʻou ko eni pe naʻe tuʻuaki pe ʻikai. ʻOku ʻi ai foki mo e tokanga pe naʻe fakafou eni ʻi he PSC. Ko e tokanga pe he ko e vahe ʻa e niʻihi ko eni mei he paʻanga tukuhau ʻa e kakai pea mo e meʻa ʻoku ʻasi mai ʻi he palani ngaue ʻa e ʻOfisi Palemia. Meʻa ʻa e Palemia ʻo fakamaʻalaʻala ʻoku ʻi ai pe ʻa e kau ngaue ʻoku ne mafai ke ne fili pe ʻeia ʻo kau ai ʻa e fakaʻuli, sekelitali mo e kau faleʻi. Naʻe ʻikai kene toe fili ha fakaʻuli foʻou, pea ko ʻene sekelitali naʻa ne fili pe ʻeia pea ʻoku vahe pe ia mei vahe ʻa e Palemia. Hoko atu ʻa e meʻa ʻa e Fakafofonga Nopele ko e fakaʻamu pe ke fai ha muimui ki he lao pea hange ko e palani ngaue. Fakatonutonu mei he Minisita Paʻanga ko e ngaahi lakanga ko eni naʻe fakanofo pe ʻi loto pe ʻi he fiemaʻu ʻa e lao. Hoko atu e meʻa ʻa e Fakafofonga Nopele ʻo fakatokangaʻi ʻa e toʻo ʻa e ngaahi paʻanga ki he vaʻa fetuʻutaki pea ko e kole pe ha fakamaʻalaʻala. Meʻa ʻa e Tokoni Palemia ko e Communnication ʻoku hiki ia ki he MEIDECC. Hoko atu ʻa e Fakafofonga Nopele pe ʻoku fou leva ʻi fe ʻa e fetuʻutaki ʻa e ʻOfisi Palemia ki he kakai. Meʻa ʻa e Tokoni Palemia ʻoku kehekehe pe ko e tafaʻaki fakatekinikale ʻoku hiki ki he MEIDECC ka ko e tafaʻaki ki he press ʻoku kei ʻi he ʻOfisi Palemia pe. Ko e Information ʻa e ʻOfisi Palemia ʻoku kei ʻi he PMO pe ko e Communication pe ʻoku ʻave ki he MEIDECC. Hoko atu ʻa e meʻa ʻa e Fakafofonga Nopele ʻoku hange ʻoku toe hiki hake ʻa e vahenga.

Meʻa ʻa e Fakafofonga Nopele Fika 2 Haʻapai ʻo tokanga pe ʻe lava ke ʻoange ʻa e faingamalie consultant maʻae kakai ʻi Tonga ni. Meʻa ʻa e Minisita Tanaki Paʻanga Hu Mai ʻoku ʻataa e ngaahi ngaue ko eni ki he taha kotoa kau ai e kau Tonga.

Meʻa ʻa e Fakafofonga Nopele ʻEua ko e ʻuhinga ʻa e hohaʻa ki he hiki ko eni ʻe 200k he ʻoku teʻeki ke maʻu ʻa e paʻanga ke fai ʻaki ia. ʻOku ʻikai ko ha taupe eni he patiseti ka ʻoku fai ʻa e tokanga ki he vouti ko eni he ko e ʻOfisi mahuʻinga taha eni he fonua.

Tali ʻa e Vouti 7, teʻeki ke paloti, toki paloti fakaʻangataha.

VOUTI 8 – POTUNGAUE PAʻANGA

Meʻa ʻa e Sea ʻe aleaʻi fakataha ʻa e vouti ko eni mo e ngaahi tohi tangi fika 3,4,6,11/2015.

Meʻa ʻa e Minisita Paʻanga ko e Tohi Tangi Fika 11/2015, ʻoku ʻiai ʻa e $500K ʻoku tuku mai ki he no ko eni. Ko e no mei he Puleʻanga ʻoku peseti ʻe 4 ka ko e toki meʻa ia ʻa e ngaahi kulupu kakai fefine ke nau toki hiki ki he 14 ʻo hange ko e tohi tangi. Ko e meʻa mahuʻinga ke ngaueʻi ʻa e paʻanga no ke ola lelei. Tohi Tangi Fika 6/2015, naʻe ʻosi fai e femahinoʻaki mo e tokotaha ko eni naʻe fai mai ʻa e kole ke kau he to hina. ʻOku ʻosi ʻataa ke kole mai ke kau ki he toʻu to hina he taʻu ni. Tohi Tangi Fika 3 mo e 4/2014, ʻoku ʻikai ke ʻoange ʻa e vahe $65 ki ha taha ʻoku ʻiai hano vahenga tukukehe ʻoku maʻulalao ange ʻene vahenga malolo he $65 pea ʻe toki top up leva ke maʻu ʻa e 65. Ko e ngaahi tuʻutuʻuni ia fekauʻaki mo e vahe ko eni. Kole ke tuku pe muʻa ke hoko atu pe ʻa e founga lolotonga.

Meʻa ʻa e Minisita Paʻanga ʻoku ʻiai ʻa e paʻanga tokoni ki he ngaahi sekitoa ʻa ia ʻoku maʻamaʻa ʻa e tupu. Pea ʻe lava pe ke fakalahi he ko e taʻu lolotonga naʻe vaheʻi ʻa e 13m ka ko e 7m pe naʻe ngaueʻaki. ʻOku fai mo e ngaue ki he founga hono fakahoko ʻo e langa tokoni ʻi Haʻapai kae tautefito ki he meʻa fakakelekele. Meʻa ʻa e Minisita Fonua ka tuai ʻa e fakatonutonu he kelekele ʻe fakahoko leva ʻa e langa ia koia he kelekele ʻo e puleʻanga kae toki fakapapauʻi pe ko hai ʻoku totonu ke ʻalu kiai ʻa e fale.

Fokotuʻu mei he Minisita Ngaahi Ngaue Lalahi ke fakafoki mai ʻa e paʻanga no ia ʻa e puleʻanga ʻo fakalele pe ia mei Fale Paʻanga he ʻoku faingofua ange ia ki he kakai. Meʻa ʻa e Minisita Tanaki Paʻanga Tukuhau naʻe ʻosi ʻi Fale Paʻanga pe ʻa e polokalama ko eni pea naʻe palopalema. Kole mei he Fakafofonga Fika 13 ke ʻai pe aa ha vaʻa makehe ʻa e pangike ke tokangaekina ai ʻa e fiemaʻu ko eni pea fai ha sio ki he meʻa maluʻi ke hoa mo e ivi e kakai e fonua. Kole pe ʻe lava ke ʻai ha kiʻi Komiti ke siofi ʻa e tohi tangi fika 11 ke muimuiʻi e ola ʻo e ngaue.

Meʻa ʻa e Fakafofonga Nopele Ongo Niua naʻe mei lava pe Minisita Ngaahi Ngaue Lalahi ia ʻo ʻohake ʻa e ngaahi meʻa ni ʻi Kapineti kenau femeʻaʻaki ai.

Meʻa ʻa e Fakafofonga Fika 4 ʻo poupou ki he fokotuʻu mei he Minisita Ngaahi Ngaue Lalahi. ʻIai mo e tokanga ki he paʻanga ʻe $300K naʻe luelue mei he Pangike ko eni he ʻoku fiemaʻu ketau falala ki he Pangike ko eni pea ʻoku ʻi ai ʻa e paʻanga ʻa e puleʻanga ʻoku ʻave ki he pangike ko eni. Tali mei he Minisita Paʻanga ko e paʻanga ko eni ʻoku teʻeki ke maʻu ia pea ʻoku kei fai pe ʻa e ngaue ki ai.

Meʻa ʻa e Fakafofonga Nopele Fika 1 Tongatapu ʻo tokanga ki he ngaahi palomesi paʻanga mo e foaki ʻo e paʻanga ʻo hangē ʻoku makatuʻunga he taumuʻa ke kemipeini. ʻOku lahi ʻa e kole mai pea ʻoku faingataʻa ki he Minisita Paʻanga he ngaahi kole hange ko e tohi tangi mo e paʻanga foaki ʻofa. ʻIai ʻa e tokanga ki he liliu lea ʻa e naʻe fakamole ki ai ʻa e vaeua miliona. ʻIai mo e tokanga ki he “revolving fund” mo e founga hono tokangaʻi ia. ʻOku mahuʻinga ʻa e ngaue ʻa e Minisita Paʻanga he ʻoku ʻi ai ʻa e mafu ʻo e fonua.

Meʻa ʻa e Fakafofonga Nopele Fika 2 Haʻapai ʻo tokanga ki he tafaʻaki ʻo e “social welfare”.

Meʻa ʻa e Fakafofonga Nopele Fika 2 Vavaʻu ki he tohi tangi fekauʻaki mo e to hina. ʻOku ʻi ai ʻa e exporter naʻe fakaʻamu ke ʻomai ʻenau tohi tangi fekauʻaki pe mo e to hina. Ko e kau uta hina mei Vavaʻu ʻoku nau kole mai talu mei Maʻasi kenau no he paʻanga to hina ka ʻoku teʻeki ke maʻu haʻanau faingamalie. Kole ki he puleʻanga ke vaheʻi ha paʻanga makehe ia maʻae kau to hina he ko e peseti ʻe 15 ʻo e GDP ko e hina ataʻata pe ia. Naʻe ʻomai mo e tohi tangi fekauʻaki mo e takimamata mei he kau private sector he tafaʻaki ko ení pea ʻoku ʻi ai ʻa e fakaʻamu ke fai ha tokoni fakamaatoato ki he sekitoa ko eni. ʻIai mo e kole ha tokoni ki he ʻapiako ʻi Makave ʻoku meaʻi pe ʻe he Minisita Moʻui he ʻoku mamaʻo ʻa e lue ʻa e fanau ako ki he kiʻi ʻapi ako ʻa ia ʻoku tuʻu ʻi he lotolotonga ʻo ha feituʻu vao.

Meʻa ʻa e Fakafofonga Fika 12 ʻo poupou ki he ngaue ʻa e Minisita Paʻanga. Naʻe ʻi ai ʻa e toenga paʻanga ʻi he vahenga 12 naʻe toʻo ʻo tokoni ki he tauʻi ʻo e no ʻi ha kiʻi motolo foʻou. Ko e $500K ko eni ʻoku tuku mai ʻe he puleʻanga ke fakafaingofuaʻi ʻaki ʻa e no ʻa e kakai ʻo e fonua ʻoku fai ʻa e fakamalo ai ka ʻe lava pe foki ke ngaueʻaki mo e paʻanga tokoni fakavahenga. ʻIkai laveʻi ʻoku aʻu ki he peseti ʻe 25 ʻa e totongi interest he no pea ʻoku totonu p eke vakaiʻi ʻe he Minisita Paʻanga. Pea ʻoku moʻoni pe ʻoku ʻikai fiemaʻu ke tuʻu ʻa e puleʻanga ke compete mo e ngaahi kautaha.

FALE ALEA

TOLOI ʻA E FALE ALEA KI HE 6PM.

Go to top