‘AHO MONITE, 22 ‘O SUNE 2015
6:00PM
FALE ALEA ‘O TONGA
1. LOTU – FAKAFOFONGA FIKA 4 TONGATAPU
2. TALI UI
3. ME’A ‘A E ‘EIKI SEA ‘O E FALE ALEA
Fili ʻe he ʻEiki Sea Leʻoleʻo ʻa e Fakafofonga Nopele Fika 2 Haʻapai ke meʻa mai ʻo Sea Komiti Kakato Leʻoleʻo he ʻoku poaki tengetange mai ʻa e Sea Komiti Kakato.
4. KOMITI KAKATO
4.1 LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016 (LAO FAKAANGAANGA FIKA 3/2015); FAKAMATALA PATISETI 2015/2016; FAʻUNGA PALANI LANGA FAKALAKALAKA ʻA TONGA 2015-2025; PALANI FAKAPOTUNGAUE 2015/2016
Hoko atu ʻa e femeʻaʻaki.
Vouti 19 – Potungaue Ngaahi Ngaue Lalahi
Meʻa ʻa e Fakafofonga Nopele ʻEua ʻoku ʻikai poupou ki he fetongitongi ko eni ke ʻave ʻa e PUMA ki he Potungaue Ngaahi Ngaue Lalahi. Neongo ʻoku malava pe ke ʻave (delegate) ʻe he Minisita Fonua ʻa e fatongia, ka ʻoku pau pe naʻe fiemaʻu ke fakapapauʻi ʻe ʻave pehe ki ha sino tauʻataina. ʻOku ʻiai mo e tokanga ʻoku fuʻu lahi ʻa e paʻanga ʻoku ʻave ki he potungaue ko eni ʻo tauhi ai. Tali mei he Palemia ko e ʻahiʻahi eni ha founga ke ngaʻunu ai ʻa e ngaue pea ke vave. Pea kapau ʻoku fai ha ilifia naʻa mole, ʻoku ʻiai ʻa e fokotuʻutuʻu ke monitor lelei ia. ʻOku fai ʻa e falala ki he tokotaha ko eni. Meʻa ʻa e Fakafofonga ko e tokanga he ʻoku ngali fuʻu lahi ʻa e fatongia ko eni.
Meʻa ʻa e Fakafofonga Nopele Fika 1 Tongatapu, ko e patiseti ko eni ʻi he vouti ko eni ko e 69m ka ko e patiseti ʻo e hala ʻoku 98m. ʻOku totonu ai ke 170m ʻa e patiseti ko eni. Tali mei he Minisita Ngaahi Ngaue Lalahi ko e palani ngaue ʻa e potungaue ʻoku ʻiai ʻa e ʻesitimeti ki he 98m he taʻu ʻe 3. ʻE hu fakakongokonga pe ʻa e hala he taʻu ʻe 3 ka hoko he ko e palani eni ki he hala kotoa ʻi Tongatapu. Hoko atu ʻa e Fakafofonga Nopele, ʻi he peesi 268 ʻa e vouti 19, ko e polokalama ʻe 5, ko e 4 pe ai ʻoku fakapaʻanga ka ko e polokalama 5 ʻoku ʻikai ha paʻanga ia ai he peesi 280. ʻOku totonu ke toʻo ʻa e polokalama 5 ia he ʻoku takihalaʻi ai ʻa e Fale ia he ʻoku noa kotoa ia. Fakatonutonu mei he Minisita Ngaahi Ngaue Lalahi ʻi he peesi 265 ʻo e taʻu fakapaʻanga lolotonga 2014/2015, naʻe ʻosi no ape ʻa e polokalama ia ko eni he puleʻanga motuʻa. Hoko atu ʻa e fehuʻi ʻa e Fakafofonga Nopele pe naʻe ʻikai mahino he taimi naʻe talanoaʻi ai ʻa e patiseti pe naʻe ʻikai fakatokangaʻi ʻa e meʻa ni.
Meʻa ʻa e Fakafofonga Nopele Fika 1 Vavaʻu ʻo tokanga ki he tuʻu ʻa e noa ko eni he vouti he ʻoku ʻikai lelei ia he ʻe hoko ia ko e lao. Tali ʻa e Minisita ko e founga ngaue pe eni ia ʻa e Fale Paʻanga pea ko e ʻai pe ke tuʻu moʻui pe ʻa e ngaahi item ko eni.
Meʻa ʻa e Fakafofonga Nopele Ongo Niua ʻo fehuʻi mo e polokalama siʻi koia ʻoku no ape ko eni ia ʻoku hiki ki he peesi 310 ki he MEIDECC, ʻa ia ko e Vaʻa ki he Ngaahi Ngaue Fakamatalaʻea.
Toe fakahoko ʻe he Fakafofonga Fika 12 ʻa e kole ke fakafoki ʻa e PUMA mo ʻene patiseti ki he Potungaue Fonua. ʻIkai tali ʻe he puleʻanga ʻa e kole ko eni.
Fehuʻi ʻe he Fakafofonga Nopele ʻEua pe ko hai naʻa ne fakangofua ke totongi ʻa e paʻanga mei he Takimamata ki he (Forbes) pea ko hai naʻa ne tali ke ʻave $80,000 mei he Internal Affairs ki he Komiti Fakalakalaka ʻa ʻEua. Tali mei he Minisita Ngaahi Ngaue Lalahi ko e lao naʻa ne tali ke fai e totongi ko eni. Ko e paʻanga ia ki hono fakamaketiʻi ʻa Tonga.
Fehuʻi ʻa e Fakafofonga Nopele ʻEua pe ko e ha hano kovi kapau ʻe fakafoki ʻa e PUMA ki he Minisita Fonua. Tali mei he Palemia ʻe ʻikai ke tali ke toe fai ʻa e fakafoki ko eni.
TALI KE ʻOMAI HA FAKAHINOHINO LAO MEI HE FAKAHINOHINO LAO ʻA E PULEʻANGA KI HE ISSUE KO ENI FEKAUʻAKI MO HONO DELEGATE ʻA E MAFAI E MINISITA FONUA KI HE MINISITA NGAAHI NGAUE LALAHI ʻI HE KUPU 6 ʻO E LAO KI HE PALANI (SPATIAL PLANNING ACT) MO HONO ʻAVE KO ENI ʻA E VOUTI ʻA E PUMA KI HE POTUNGAUE NGAAHI NGAUE LALAHI.
MAʻU MAI ʻA E FALEʻI MEI HE FAKAFOFONHA LAO KA ʻOKU ʻIHE FAKA-PILITANIA KAE LILIU MAI KI HE FAKATONGA KAE TOKI FAKAHU MAI.
FOKOTUʻU MEI HE FAKAFOFONGA 15 KE ʻAI ʻA E FOʻI LAO KI HE PUMA KE FAKALAOʻI ʻA E TRANSFER ʻO E PUMA. KAU AI MO E LAO KI HE TRANSFER ʻO E TAKIMAMATA. KA TOE ʻIAI HA MEʻA KEHE PEA FAKAHOKO MAI HA TOHI FEHUʻI. ʻIAI MO E KUPU 75 ʻO E KONISITUTONE KE SIVI ʻAKI E NGAUE.
MAʻU MAI ʻA E FALEʻI MEI HE FAKAHINOHINO LAO PULE ʻO E ʻAHO 22 SUNE 2015. LAU IA ʻA E FALEʻI FAKALAO.
FOKOTUʻU ʻE HE PALEMIA KE TALI ʻA E VOUTI FIKA 19.
PALOTI ʻO TALI ʻA E VOUTI FIKA 19. 15/2.
VOUTI 20
Meʻa ʻa e Fakafofonga Fika 4 ʻoku ha he palani ngaue he peesi 6 fekauʻaki mo e ako [public awareness]. Fuʻu lahi e kole mai ha tokoni mo ha fakamaʻalaʻala fekauʻaki mo e kelekele pea ko e konga ia ʻo e fatongia ʻo e potungaue.
Meʻa ʻa e Fakafofonga Nopele Fika 1 Tongatapu fekauʻaki mo e launga fekauʻaki mo e ngaahi fakahoko ngaue ʻa e potungaue. Kole ʻa e Palemia ko e ngaahi palopalema eni hili ha ngaahi taʻu lahi mai eni pea ʻoku kole ke tuku mai ha faingamalie ʻa e puleʻanga ko eni kenau ngaue atu kiai. Ka meʻa pea ʻomai ʻa e Lipooti ʻa e Komisoni Kelekele. Hoko atu ʻa e Fakafofonga Nopele ʻEua ko e meʻa ʻoku fai ki ai ʻa e tokanga ko e fiemaʻu ʻe he kakai ha tokoni ki hee ngaahi meʻa fakakelekele he ko e kau loea ʻoku mamafa ia. Tokoni mei he Fakafofonga Fika 4 ko e fakahoko atu pe eni ki he puleʻanga kenau tokanga mai he ko e meʻa pe eni ʻoku tokanga ki ai ʻa e kakai. Hoko atu ʻa e Fakafofonga Nopele Fika 3 Tongatapu ʻene meʻa fekauʻaki mo e ngaahi polokalama ʻa e vouti 19.
Fehuʻi mei he Fakafofonga Nopele ʻEua ki he mafai pea fakalao ha nofo ha taha ʻi ha konga kelekele. Kole pe ʻe lava ke holo hifo ʻa e lahi fakalao ki he lesisita ʻo pole ʻe 20 koeʻuhi ʻoku ʻalu ke tokolahi ange ʻa e kakai. Ko e meʻa ʻe taha ko e koloa fakaenatula ko e taʻu eni ʻe fiha e foaki e laiseni ki he kumi ki he koloa fakaenatula ka ʻoku teʻeki ke ʻomai ha lipooti ki heni. Ko e ha ʻa e tuʻunga ʻo e kumi koloa koia? Tali mei he Minisita Fonua naʻe ʻuhinga pe ʻa e lisi peheʻi ʻa Patangata ko e natula e kelekele, ka ʻe lava ʻe he Fale ʻo liliu ʻa e lao ke lava ʻa e holo ko eni ki he pole ʻe 20 kae lava ʻo lesisita. Fehuʻi ʻa e Fakafofonga Nopele Fika 1 Tongatapu ko e meʻa ko eni ki Patangata ko hai ʻoku ʻoʻona ʻa e feituʻu ko eni? Tali mei he Minisita Lao naʻe fai pe ʻa e faleʻi mei he Tokoni ʻAteni Seniale ki he tuʻunga e ngaahi hopo naʻe fai pea ʻoku fakalao pe ngaue ia ka ʻoku kei fai ʻa e fakatonutonu fakalao ai.
VOUTI 23
Meʻa ʻa e Fakafofonga Fika 13 fekauʻaki mo e ngaahi letio mo e totongi laiseni. Tali mei he Tokoni Palemia ʻoku fai e ngaue ki he totongi e letio pea ʻoku teuteu ke fakahu mai ki he Kapineti. Hoko atu ʻa e Fakafofonga ko e ngaahi letio I tahi [teleletio he fefolauʻaki] ʻoku sivi ʻe he Malini pea toe sivi ʻe he Information, pea ko e totongi ia ʻe ua. Tali mei he Tokoni Palemia ʻoku fai e ngaue ke siofi fakalukufua ʻa e ngaahi totongi kehekehe ko eni.
VOUTI 22
Meʻa ʻa e Fakafofonga Nopele Fika 1 Tongatapu ʻo tokanga ki he fakafoki e potungaue ko eni ki he Potungaue Paʻanga pea ʻe ngali uesia ai ʻa e potungaue ko eni. Tali mei he Minisita Paʻanga ʻoku kei tuʻu tauʻataina pe ʻa e potungaue ia ko eni pea ʻoku hiki ʻenau patiseti.
PALOTI ʻO TALI ʻA E VOUTI 15, 16, 17, 18, 20, 21, 22, 23. 16/1.
PALOTI FAKALUKUFUA ʻA E POLOKALAMA PATISETI – LAO FAKAANGAANGA KE FAKAHU ATU ʻA E PAʻANGA KI HE NGAAHI NGAUE ʻA E PULEʻANGA 2015/2016. 16/1.
FALE ALEA (11:54PM).
TOLOI ʻA E FALE ALEA KI HE 10AM, TUSITE 23 SUNE.

Go to top