'Aho 31 'o Me, 2018
Kingi Tupou VI,
Ko e Tu’i ‘o e ‘Otu Tonga
Palasi Faka-Tu’i,
NUKU’ALOFA.
‘E Ho’o ‘Afio,
Fakafeta’i ki he ‘Otua Mafimafi, ko e Tu’i Aoniu, He’ene fakalakoifua lelei ‘a e ‘Afioʼ na, ko e Tu’i ‘o Tonga pea kei tu’utai ‘a e Pule ‘a Ha’a Moheofo.
‘Oku mau fakamalumalu atu he talamalu Ho fonua, kae fakahoko atu ‘a e fatongia talu mei tuai ‘o e Fale Alea ‘o Tonga, koe’uhi ko e koloa kuo tooʼ, Ho’o hā’elea mo huufi ‘a e Fale Alea ‘o Tongaʼ.
‘Oku mau fakafeta’i ‘i he toka Ho finangaloʼ hono tokangaekina ‘a e kakai faingata’a’ia ‘i he Saikolone ko Gita mo e mokoi ke toe vave ange ‘a e to‘o fatongia ki hono fakalelei‘i ‘a e ngaahi fakatamaki ne hoko ‘i he saikoloneʼ. ‘Oku mau tukupā te mau fakahoko homau tukuingataʼ mo ngaue fakataha mo e ngaahi kupu fekau‘aki ki hono fakakakato ‘o e fiema‘u vivili ‘a e kakai na’e mo‘ua ‘i he faingata‘aʼ.
‘Oku mau poupou kakato ki hono tauhi ‘a e Pule ‘a e Lao pea te mau ngaue fakataha ki hono fakamalohia ‘a e lao ke ne malava ‘o pukepuke ‘a e melino, tau’ataina mo e ma‘uma‘uluta ‘o e fonua
‘Oku mahino ‘a e langimama’o Ho’o ‘Afio ‘o fekau’aki mo e mahu‘inga ke fakapotopoto‘i ‘a hono tauhi mo malu‘i ‘a e ‘ātakai koe‘uhi ko e to‘u tangata ‘o e kaha‘uʼ.
‘Oku hokohoko ‘aho pe ‘a e ngaahi palopalema fakasosiale ‘oku tofanga ai ‘a e fonuaʼ, kau ai foki ‘a e nunu’a ‘o e faito’o konatapuʼ. Koe fatongia mafatukituki ia ‘a e Fale Alea ‘o Tonga, ke fakapapau‘i ‘oku fa‘u mo fakalelei’i ‘a e lao ke fakaivia ‘a e ngaahi sino ngāue ‘oku nau tokangaekina ‘a e ngaue ki hono fakafepaki’i ‘o e faito’o konatapu pea taau ‘a e tautea kiate kinautolu ‘oku nau fakahoko ‘a e ngaue kovi ni.
Koe hakau ‘o e ‘aho nl ko e fonua ia ‘o e kaha’u pea ‘i he laumalie ko ia, te mau fakahoko ‘osikiavelenga homau fatongia ‘i hono paotoloaki mo teu’i ha ngaahi ngaue ki he to’utupu ‘o Tonga ni, pehe ki ha ngaahi faingamalle ki tu’apule’anga foki.
‘Oku mau ta‘imālie he mokoi ‘oku toka ki he ako mo e mo‘ui lelei ‘a ia ‘oku fa‘a fakakoloa ‘aki ‘a e Fale Alea ‘o Tonga ‘i he ta’u kotoa. ‘Oku mau fakamonū homau koloa ke fakamahu’inga’i ‘a hono hiki ‘a e tu‘unga ‘o e ako fakalotofonua mo e mo‘ui lelei ke ‘i ha tu‘unga fakavaha‘apule‘anga ‘e a‘usia ai ha kaha‘u tu‘uloa ma‘a Tonga.
‘Oku mau tulifua ke fisi-ki-tu’a mei he’emau fakahokofatongia ‘a e moto ‘oku laukau’aki ‘e he Tongaʼ ‘a e "‘Otua mo Tonga ko hoku Tofi‘aʼ". Ke fakahoko ‘emau palani ngaue ‘i ha founga fakapotopoto mo taimi loloa ‘e ola ko ha visone ke vakavakaō mo e taki lelei, fakalakalaka mo e ma‘uma‘uluta ‘a e fonua.
Koe koloa kuo tō mei loto tatau na, he hounga’ia ‘i he tokoni mo e langa fonua ‘oku fakahoko ‘e he kakai Tonga ‘i tu‘apule‘anga, fakataha mo ia mo e vā ngaue fetokoni‘aki mo e ngaahi pule‘anga muli pea mo e ngaahi kautaha fakavaha‘apule‘anga mo fakatāutaha. Te mau tauhi ki he lelei taha ‘a e ngaahi vā fengaue’aki koia ki he langa fakalakalaka ‘o e Fonuaʼ.
Talamonu atu ki Ho’o ‘Afio mo Ho faleʼ, ke monimonūmonitonu ‘a Ho’o pule mo e tataki Ho kakaiʼ, pea taumalingi mai ‘a e ngaahi tāpuaki ‘a Sihova, ke kei tu’uloa ‘a e pule ‘a e ‘Afio na
‘Oku ou faka‘apa‘apa mo e loto ‘apasia mo‘oni.
