‘OKU teu fakalele 'e he 'ofisi e 'Eiki Sea 'o e Fale Alea 'a e Uike Fale Alea ma'a Tonga ke kamata he Monite kaha'u, 'aho 6 - 10 'Okatopa.

Ko e faka'amu ki he ola mei he uike Fale Alea ni ke fakalotolahi'i 'a e kakai ke longomo'uiange 'enau kau mai ki he me'a fakapolitikale 'oku hoko he fonua. ‘E malava ke a'usia eni 'i he mahino lahi kia nautolu 'a e founga mo e fa'unga fakapolitikale tautefito ki he Fale Alea 'a ia ko e tokolahi honau kau memipa 'oku fili kinautolu 'e he kakai.

Ko e kaveinga 'o e uike Fale Alea "Ko hotau Fale Alea”. ‘Oku fakataumu'a ia ke tukuatu kitu'a 'e he Fale Alea 'a e ngaahi fakamatala ki he kakai fekau'aki mo e ngaue mo ngaahi 'o e Fale Alea, he ko hotau Fale Alea.

Hili e fakalelei fakapolitikale ne mokoi ki ai e La'a kuo to, Siaosi Tupou V, kuo tukumai e mafai fakapolitikale ki hono fakalele hotau fonua kia kitautolu tangata'i fonua mo e fefine'i fonua Tonga.

'Oku fakalele 'a e polokalama ni 'e he Fale Alea 'i he fengaue'aki mo e va'a e Kautaha e ngaahi Pule'anga ki he polokalama fakalakalaka pe UNDP, 'o fakamalumalu he polokalama ki hono teke 'a e pule lelei. 'Oku fakapa'anga kakato 'a e Uike Fale Alea 'e he Va'a ki Muli mo Fefakatau'aki e Pule'anga 'Aositelelia.

‘A ia ko e konga ia e feinga 'a e Fale Alea ke fakatupulaki mo langa hake ha fa'ahinga pule'anga 'oku ne malava ke fakafofonga'i hono kakai ki Fale Alea, pea ke to e longomo'uianga 'etau kaunga 'a kitautolu kakai ki he ni'ihi 'oku nau fakafofonga'i kitautolu ki he Fale Alea.

‘E kau ‘i he polokalama uike ‘e taha ni, ‘a e vakai ki he ngaahi kaveinga kau ai ‘a e ngaahi mafai pule ‘e tolu ‘a e pule’angá mo e fekau’aki ‘a e kapinetí, Fale Alea pea mo e fakamaau’angá.

‘E ngāue fakataha ‘a e kau ngāue mei he ngaahi va’a kehekehe e ‘ofisi ‘o e ‘eiki sea ‘o e Fale Alea mo e ngaahi sosaieti sivilé pehē ki he ngaahi kupu fekau’akí ke tukuatu e ngaahi fakamatala ki he kakaí mo e fānau ako ‘e lava mai ki he polokalama.

‘E tataki ‘e he sea ‘o e Fale Alea mo ‘ene kau ngāué ‘a e polokalama ni. ‘e ‘i ai mo e ngaahi lea ‘e tataki ‘e he ‘eiki seá, fakafofonga mei he va’a ki muli mo fefakatau’aki ‘a ‘Aositelēlia mo e UNDP ‘i he polokalama fakaava ‘i he mōnite kaha’ú (6 ‘okatopa).

‘E toki faka’osi’aki ‘a hono ‘ahia ‘e he kau ‘a’ahí ‘a e ngaahi tēpile ‘e ‘i ai e ngaahi fakamatala fekau’aki mo e ngāue ‘o e ngaahi ngāue ‘a e Fale Alea.

‘Oku kau ai ‘a e puipuitu’a mo e hisitōlia ‘o e Fale Alea, ko e hā e ngaahi liliu ne fakahoko ‘i he fakalelei fakapolitikale ‘o e 2010, ko e felāve’i ‘a e ngaahi mafai pule ‘e tolu ‘a e pule’anga --- kapineti, falealea kae pehē ki he fakamaau’angá, founga hono alea’i mo fakapaasi e lao fakaangaangá kimu’a pea hoko ‘o laó, ko e ngaahi tefito’i fatongia ‘o e Fale Alea mo e ngaahi kaveinga kehe pē.

Ko e polokalama ‘a’ahi ki Fale Alea ‘e konga ua ‘a ia ko e houa pongipongí ma’ae fānau akó mei he 10 am-12pm pea kakai lalahí ‘i he houa efiafi mei he 1:30pm-3:30pm. ‘oku fakafuofua ki he ngaahi ‘apiako kolisi ‘e 10 te nau kau mai ki he polokalama ni.

‘I ai mo e ngaahi polokalama makehe ‘e fakalele lolotonga ‘a e uike Fale Alea kau ai ‘a e polokalama letiō mo e tali fehu’i, fe’auhi fa’u ‘esei mo e fe’auhi fa’u maau. ‘Oku to e ‘i ai mo e polokalama makehe ‘e fakahoko ia ki he manafa civic square ‘i loto nuku’alofá he tu’apulelulu mo e falaite kaha’u.

“Ko e hā ‘a e ‘uhinga ‘o e falealeá kiate koé” ‘a e kaveinga ‘o e fe’auhi fa’u ‘esei mo e fa’u maau ‘i he uike Fale Alea.

‘E kulupu pē ‘e 1 ‘a e fe’auhi ni, ‘a ia ‘e ‘atā pē ki ha fa’ahinga taha ‘oku kei ako pe ‘osi mei he akó ke kau mai ki he fe’auhi ni.

Ko e pale ‘uluaki ki he fe’auhi ‘esei ko e $700 (tokoni fakapa’anga ‘a e Kingdom Travel Centre), pale 2 $500 (tokoni fakapa’anga ‘a e A&A Retailer), pea $300 ‘a e pale 3 (tokoni fakapa’anga ‘a e Nishi Trading).

Ko e maaú, pale ‘uluakí $700 (tokoni fakapa’anga ‘a e Kautaha Fetu’utaki ‘a Tonga (TCC), pale 2 $500 (tokoni fakapa’anga ‘a e Prema & Sons Ltd), pea $300 ‘a e pale 3 (tokoni fakapa’anga ‘a e kautaha Palu Aviation Services).

Ko e ngaahi ‘esei pē maau ko ení ‘e malava pē ke fa’u ‘i he lea fakatongá pe lea fakapilitāniá. ko e ‘eseí ke ‘oua to e si’i hifo he fo’i lea ‘e 1000 pea ‘oua laka hake he fo’i lea 1,500.

Ko e maaú ke fa’u ‘o ‘oua ‘e to e si’i hifo he veesi ‘e fā.

‘E to e ‘i ai mo e ngaahi pale makehe ‘e foaki lolotonga ‘a e uike Fale Alea ‘i he tokoni fakapa’anga ia ‘a e falekai Lunarossa, Waterfront Restaurant & Lodge mo Vakaloa Beach Resort.

‘I ai foki mo e pale makehe $500 ko e pale fili ‘a e ‘eiki sea ‘o e Fale Alea mei he ongo ‘a ia kuo angalelei ai’ a e kautaha tonga power ltd & home gas ltd ke fakapa’anga e pale ko iá.

Kuo ‘atā he taimí ni ke fa’u mai e ngaahi ‘esei mo e maaú ke ‘oua ‘e to e tōmui mai ki he ‘ofisi Fale Alea ‘i he taimi 4pm ‘aho 8 ‘Okatopa.

Ko e fakaikiiki fekau’aki moe ngaahi fe’auhi ko eni ‘o e uike Fale Alea ke fetu’utaki mai ki he tokoni kalaké, Dr Sione Vikilani fika telefoni 23565.

Go to top