ʻOku ʻoatu heni ʻa e fakaafe mei he Kōmiti Tuʻumaʻu ki he Lao ʻa e Fale Alea ʻo Tongá ki he kakai ʻo e fonuá ke mou kau mai ki he Polokalama Talatalanoa mo e Kakaí ʻo fekauʻaki mo e Lao Fakaangaanga ʻa Tonga ki hono Fakamaauʻi ʻo e Toʻutupú 2024 (Tonga Youth Justice Bill 2024).
ʻOku ʻamanaki ke fakahoko ʻa e fakataha ko ʻení ʻi he ʻaho Pulelulu 16 ʻo ʻOkatopa, ʻi he taimi 10 pongipongi ʻi he Fale Fakatahaʻanga ʻa e Fale Alea.
Ko e taumuʻa ʻo e fakataha ko ʻení ke aleaʻi ai ʻa e Lao Fakaangaanga ʻa Tonga ki hono Fakamaauʻi ʻo e Touʻutupú 2024 (Tonga Youth Justice Bill 2024). ʻE fakamaʻalaʻala ai ʻa e lao fakaangaanga ni ʻe he ngaahi kupu fekauʻakí mo fakaafeʻi ha ngaahi fokotuʻu fakakaukau mei he kakai ʻo e fonuá.
Ko e ngaahi tefitoʻi taumuʻa ki he Lao Fakaangaanga ni ke –
- taʻofi ha tamasiʻi pe taha kei siʻi ʻa ia kuo tukuakiʻi kuo ne fakahoko ha hia mei haʻane kau atu ki he sisitemi fakamaauʻanga hia mo hono ngaahi nunuʻa kovi ʻe muimui mai ai;
- fakahoko ha ngaue ʻoku feʻunga mo e taʻu motuʻa, fakalakalaka mo e anga fakafonua ki he faihia ʻa e toʻutupu;
- fakasiʻisiʻi ʻa e ngaue ki he fakamaauʻanga ʻaki hono ʻave ʻa e ngaahi keisi iiki mei he ngaahi fakamaauʻanga; pea
- fakasiʻisiʻi ʻa e faingamalie ke toe faihia mo fakahoko ha ngaue ki he ngaahi meʻa ʻoku ne fakatupu ʻa e ʻulungaanga faihia ʻaki hono faʻu ʻo ha Ngaahi Palani Ngaue Fakatonutonu ʻo e Toʻutupu ʻa ia ʻoku taau pea muimuiʻi.
Ko e lao fakaangaanga ʻeni ʻoku tuku atu:
LAO FAKAANGAANGA FIKA 15/2024 (Tonga Youth Justice Bill 2024)
ʻOku ʻatā ke fakahū mai ʻa e ngaahi fokotuʻu tohi kotoa pē ʻoku fekauʻaki mo e lao fakaangaangá ki he Kōmiti ʻi he ngaahi founga ʻoku fakahā atu ʻi laló, ka ʻ e ʻ ikai ke toe tomui ange ʻ i he taimi 4:30pm ʻo e ʻ aho Pulelulu 23 ʻo ʻOkatopa 2024.
Ko e ngaahi fokotuʻu tohi kotoa pē ʻe fakahū mai ki he Kōmití, kuo pau ke ʻi ai ʻa e ngaahi meʻá ni:
- Fatu ʻi he lea faka-Tongá
- Fakahā mahino ʻa e hingoa ʻo e tokotaha ʻoku ne fakahū mai ʻa e fokotuʻu tohí, mo e fika telefoni fetuʻutakí
- Fakahā mai ʻa e vāhenga fili ʻoku ke fili aí
- Fakamahino ʻa e hingoa ʻo e lao fakaangaanga ʻoku makatuʻunga ai ʻa e fokotuʻu tohí
- Fakamahino ʻa e kupu pe ngaahi kupu ʻo e lao fakaangaangá ʻoku fekauʻaki mo e fokotuʻu tohí
Ko e ngaahi fokotuʻu tohi kotoa pē ʻa e Houʻeiki mo e kakai ʻo e fonuá ʻe lava ke fakahoko mai ia ʻi hono fakafonu ʻa e foomu fakaʻilekitulōnika ko ʻení Foomu Fokotuʻu Tohi ki he Kōmiti Tuʻumaʻu ki he Laó ʻa e Fale Alea ʻo Tongá https://form.jotform.com/242177459840060 ,pē ko hono fakahū mai ʻa e fokotuʻu tohí ki he ʻŌfisi ʻo e Fale Alea ʻo Tongá ki Tofoa, Nukuʻalofa ʻi he taimi ngāué, pē fakafou ʻi he ʻīmeilí ki he tuʻasila ʻīmeili ko e
Ki ha toe fakaʻekeʻeke pe fiemaʻu fakamaʻalaʻala, kataki ʻo telefoni ki he 24-455/ 0800455 pe ko hoʻo aʻu tonu mai pē ki he ʻŌfisi ʻo e Fale Alea ʻo Tongá ʻi he taimi ngāué.
Fakaʻapaʻapa atu,
Kōmiti Tuʻumaʻu ki he Laó ʻo e Fale Alea ʻo Tongá