FALE ALEA ʻO TONGA
ONGOONGO TUKU ATU
MA’U ‘E HE ‘OFISI ‘O E ‘EIKI SEA ‘O E FALE ALEA ‘A E FANONGONONGO ‘O E TAUMU’A KE FAKAHOKO HA FOKOTU’U KE FAKAMALOLOO’I ‘A E ‘EIKI PALEMIA
Kuo ma’u ‘e he ‘Ofisi ‘o e ‘Eiki Sea ‘o e Fale Aleá ‘i he ‘aho Tokonaki 23 ‘o Novema 2024 ‘a e Fanongonongo ‘o e Taumu’a ke Fakahoko ha Fokotu’u ke Pāloti ke Fakamālōloo’i ‘a e ‘Eiki Palemiá, Hon. Siaosi Sovaleni. Na’e ‘omai ‘a e Fanongonongó ni ‘e he Fakafofonga ‘o e Kakai ma’a Tongatapu 5, Hon. Dr ‘Aisake Valu Eke, fakataha mo e Fokotu’u ke Pāloti ke Fakamālōloo’i ‘a e ‘Eiki Palemiá, ‘a ia kuo fakamo’oni poupou ki ai ‘a e Hou’eiki Memipa ‘e toko hongofulu ‘o e Fale Alea ‘o kau ai ‘a Dr Eke.
‘Oku lolotonga fakahoko ‘a e ngaue ‘a e ‘Ofisi ‘o e Fale Alea ki he fokotu’u ni ‘o fakatatau ki he fiema’u ‘a e Kupu 50B Konisitūtoné, kae pehē ki he Ngaahi Tu’utu’uni ‘o e Ngaahi Fakataha ‘a e Fale Aleá. ‘E toki fanongonongo atu ‘a e fakaikiiki ‘o e hokohoko ‘o e ngaahi ngaue ‘a e Fale Alea ki he kaveinga ni.
Tuku Atu ʻi he Fakangofua ʻe he Kalake Pule ʻa e Fale Aleá
ʻAho 25 Novema 2024
ʻOfisi ʻo e Fale Alea ʻo Tonga, Nuku’alofa, Tonga
