FALE ALEA ʻO TONGA
ONGOONGO TUKU ATU
TOLOI KI HE ‘AHO MONITE 9 TISEMA 2024 ‘A E FAKATAHA ‘A E FALE ALEA ‘E TEPILE’I AI ‘A E FOKOTU’U KI HA PALOTI KE FAKAMALOLOO’I ‘A E ‘EIKI PALEMIA
Kuo toloi mei he ‘aho Tusite 3 ‘o Tisema 2024 ki he ‘aho Monite 9 Tisema 2024, ‘a e fakataha ‘a e Fale Alea ‘e tepile’i ai ‘a e Fokotu’u ki ha Paloti ke Fakamaloloo’i ‘a e ‘Eiki Palemia, Hon. Siaosi Sovaleni. Na’e tali ‘a e toloi ni ‘i ha tu’utu’uni faka-Fale Alea na’e fakahoko ‘i he tohi ‘avetakai ki he Hou’eiki Memipa ‘o e Fale Alea. ‘Oku makatu’unga ‘a e toloi ke fakafaingamalie’i ʻa e kole mei he ʻEiki Palemia ki he Fale ke fakaloloa ‘a e taimi ‘oku fakaʻataa ange ke fakahu mai ai ha’ane tohi tali ki he Fokotu’u ke Fakamaloloo’i. Na’e‘oatu foki ‘e he ‘Eiki Sea ‘a e ‘uluaki faingamalie ke fakahu mai ‘a e tohi tali ‘a e ‘Eiki Palemia kimu’a he 12 ho’ata ‘o e ‘aho Falaite 29 Novema 2024. Kuo toe fakaloloa ai ‘a e taimi ke fakahu mai ai ‘a e tohi tali ‘a e ‘Eiki Palemia ki he Fokotu’u, ke toki ngata ki he taimi 12 ho’ata ‘o e ‘aho Pulelulu 4 ‘o Tisema 2024.
‘Oku kei faingamalie pe hono toloi ‘a e fakataha ki he ‘aho 9 ‘o Tisema 2024, pea kei ‘i loto pe he taimi ngaue kuo pau ke tepile’i ai ‘i Fale Alea ‘a e Fokotu’u ʻo hange ‘oku tu’utu’uni ‘e he Kupu 50B ‘o e Konisitutone mo e Ngaahi Tu’utu’uni Ngaue ‘a e Fale Alea.
Tuku Atu ʻi he Fakangofua ʻe he Kalake Pule ʻa e Fale Aleá
ʻAho 29 Novema 2024
ʻOfisi ʻo e Fale Alea ʻo Tonga, Nuku’alofa, Tonga
