FILI ʻA LORD FAKAFANUA KO E FUOFUA SEA ʻO E POATE ʻO E FAKATAHAʻANGA FAKA-FALE ALEA ʻA E NGAAHI FONUA ʻO E PASIFIKÍ

Ko e ʻaho fakahisitōlia eni koeʻuhi ko hono fokotuʻu ʻa e fuofua sino faka-Fale Alea fakafeituʻu ʻa e Pasifikí ʻa ia ko e Fakatahaʻanga Faka-Fale Alea ʻa e Ngaahi Fonua ʻo e Pasifikí (Pacific Islands Inter-Parliamentary Assembly) (PIPA).

Naʻe ʻiloa kimuʻa ʻa e PIPA ko e PIPG (Kulupu ʻo e Ngaahi Fale Alea ʻa e Pasifikí), ka ko hono liliu ko ʻení ʻoku ne fakaʻilongaʻi ai ʻa hono fakamālohia ʻa e ngaahi vā fengāueʻaki fakafeituʻu ʻa e ngaahi Fale Aleá. ʻE malava ai ke fakahoko ʻa e ngaahi alēlea mo e fetokoniʻaki ʻi he ngaahi kaveinga ngāue mahuʻinga faka-Fale Alea.

Lolotonga ʻa e fuofua fakataha ʻa e PIPA, naʻe fili ai ʻe he ngaahi Fale Aleá ʻa e kau mēmipa ʻi he poate ʻa e PIPA, ʻa ia ʻoku kau ki ai ʻa Tonga, Fisi, Tahiti, ʻOtu Motu Solomoné mo Palau. Naʻe fili ai ʻe he ngaahi Fale Alea ʻoku memipa ʻi he PIPA ʻa Lord Fakafanua, ʻEiki Sea ʻo e Fale Alea ʻo Tonga, ko e fuofua Sea ia ʻo e Poaté ʻi he loto taha ki ai ʻa e fakatahaʻangá.

Naʻe hoko atu ai pe ki he fakamoʻoni ʻo e Ngaahi Lao ʻoku ne faʻu ʻa e PIPA (Statutes of the Pacific Inter-Parliamentary Assembly) ʻe he Poate ʻo e PIPA, ʻa ia naʻe fakamoʻoni ki ai ʻa Lord Fakafanua ʻo fakafofongaʻi ʻa e Fale Alea ʻo Tongá. Naʻe loto taha foki ʻa e houʻeiki Memipá ke tali ʻa e Tuʻutuʻuni Fakahā Natadola (Natadola Declaration) mo fakapapauʻi ai pe ʻa hono fakahoko ʻa e fuofua fakataha ʻa e PIPA ki Tahiti ʻi he taʻu kahaʻú.