HOKO ATU PE FAKAHOKO FATONGIA ‘A E FAKAFOFONGA FALE ALEA ‘O E KAKAI ‘O E VAHENGA FILI NIUA 17 KAE ‘OUA KUO MAHINO ‘A E OLA ‘O E TU’UTU’UNI FAKAMAAU’ANGA TANGI

FALE ALEA ʻO TONGA

ONGOONGO TUKU ATU

HOKO ATU PE FAKAHOKO FATONGIA ‘A E FAKAFOFONGA FALE ALEA ‘O E KAKAI ‘O E VAHENGA FILI NIUA 17 KAE ‘OUA KUO MAHINO ‘A E OLA ‘O E TU’UTU’UNI FAKAMAAU’ANGA TANGI

‘Oku kei ma‘u pe ‘e he Fakafofonga ‘o e Kakai Vahenga Fili Niua 17, Hon. Lataifaingata‘a Tangimana hono sea ko e memipa ‘i he Fale Alea ‘o Tonga kae ‘oua kuo mahino ‘a e tu’utu’uni ‘a e Fakamaau’anga Tangi.

‘I he ‘aho 9 ‘o ‘Epeleli 2026, na’e ma’u ‘e he ‘Eiki Sea ‘o e Fale Alea ‘o Tonga ha tohi meia ‘Eiki Fakamaau Lahi Garlick KC ‘o fakaha mai kuo fakata‘e‘aonga‘i ‘e he Fakamaau‘anga ‘a hono fili ‘o e Fakafofonga Kakai Niua 17 ki he Fale Alea makatu’unga ‘i he ola ‘o e hopo Kole Tu’unga ‘i he Fili (CV54/2025 Finau v Tangimana). Na‘e makatu’unga heni hono fanongonongo ki he Hou’eiki Memipa ‘o e Fale Alea ‘i he ‘aho 13 ‘Epeleli 2026 ke fakataha 'a e Fale Alea ‘i he ‘aho 27 ‘o ‘Epeleli 2026. Ko e fakataha eni na‘e ‘amanaki ke fakahoko ai ‘a hono fakahifo (unseat) ‘a e Fakafofonga Kakai ‘o Niua 17, Hon. Lataifaingata‘a Tangimana ‘o makatu‘unga ‘i he tohi meia ‘Eiki Fakamaau Lahi Garlick KC. Ko e ‘asenita pe ia ‘e taha na’e fokotu‘u ki he fakataha ni.

Kuo toe kaniseli ai ‘a e fakataha ne ‘amanaki ke fakahoko he ‘aho 27 ‘o ‘Epeleli 2026, koe‘uhi ko hono toe ma‘u mai ‘a e tohi meia ‘Eiki Fakamaau Garlick KC ‘i he ‘aho Monite 20 ‘Epeleli 2026. Na‘a ne fakaha mai ‘i he tohi ko ia ‘a e Tu’utu‘uni Fakamaau‘anga ‘o e ‘aho 11 ‘o ‘Epeleli 2026. Ko e Tu‘utu‘uni eni ke ta’ofi fakataimi (stay) hono ngaue‘aki ‘a e Tohi Fakamo‘oni ‘a e Fakamaau’anga ‘o e ‘aho 9 ‘Epeleli 2026 ko e ola ‘o e hopo Kole Tu’unga ‘i he Fili (CV54/2025 Finau v Tangimana). Ko e ta’ofi fakataimi (stay) eni ‘o fakatatali ki he ola ‘o e tangi ‘i he hopo ni kuo ‘oatu ki he Fakamaau’anga Tangi. Ko e Hopo Tangi ‘e toki fakahoko ia ‘i Siulai 2026.

Makatu‘unga ‘i he Tu‘utu‘uni Fakamaau‘anga ‘o e ‘aho 11 ‘o ‘Epeleli 2026, ‘e ta’ofi fakataimi (stay) leva hano ngaue‘aki ‘e he Fale Alea ‘a e Tohi Fakamo‘oni ‘a e Fakamaau‘anga ‘o e ‘aho 9 ‘Epeleli 2026. ‘Oku ‘uhinga eni ‘e ‘ikai fakahifo ‘e he Fale Alea ‘a e Fakafofonga Kakai ‘o Niua 17 mei hono sea ‘i he Fale Alea, kae‘oua kuo toe ma‘u ha tu‘utu‘uni ‘i ha hili ha tu‘utu‘uni ‘a e Fakamaau‘anga Tangi.

Tuku Atu ʻi he Fakangofua ʻe he Kalake Pule ʻa e Fale Aleá

ʻAho 24 ‘o ‘Epeleli 2026

ʻOfisi ʻo e Fale Alea ʻo Tonga, Nuku’alofa, Tonga