KAKATO ‘A E ME’A ‘A’AHI ‘A E HOU‘EIKI MEMIPA MEI HE FALE ALEA ‘O TONGA KI HE LEPAPULIKA ‘O E KAKAI SIAINA

LEGISLATIVE ASSEMBLY OF TONGA

ONGOONGO TUKU ATU

KAKATO ‘A E ME’A ‘A’AHI ‘A E HOU‘EIKI MEMIPA MEI HE FALE ALEA ‘O TONGA KI HE LEPAPULIKA ‘O E KAKAI SIAINA

Kuo kakato pea ola lelei ‘a e me’a ‘a’ahi na’e fakahoko ‘e he Hou’eiki Memipa mei he Fale Alea ‘o Tonga ki he Lepapulika ‘o e Kakai Siaina ‘a ia na’e fakahoko mei he ‘aho 6 – 15 ‘o Mē, 2026.

Ne taki atu ‘e he ‘Eiki Sea ‘o e Fale Alea, Lord Vaea pea kau ki ai mo e Hou’eiki Fakafofonga ‘e toko 10 mo e kau ngāue Fale Alea ‘e toko 4.

Na’e fakahoko ‘a e ‘a’ahi ko ‘eni ‘i ha fakaafe mei he Va’a Ngāue Fakavaha’apule’anga ‘a e Komiti Pule ‘a e Paati Faka-komiunisi ‘a e Kakai Siaina (International Department of the Central Committee of the Communist Party of China IDCPC) ki he ‘Eiki Sea ‘o e Fale Alea ‘o Tonga.

Ko e ‘a’ahi ko ‘eni ‘oku tokoni ia ki hono fakamalōhia ‘a e ngaahi vā ngāue Faka-Fale Alea, fakamalōhia e femahino’aki mo e ‘ilo ‘a e ongo fonua pea fakaloloto ‘a e vā fengāue’aki ‘i he vaha’a ‘o Tonga mo Siaina.

Ko e taha ‘o e ngaahi makamaile mei he polokalama ni, ko e me’a ‘a’ahi na’e fakahoko ‘e he Hou’eiki Memipa Fale Alea ki he matanga ‘iloa mo fakahisitōlia ‘a Siaina ko e “The Great Wall of China” pea na’e toe fakamanatu ai ki he Hou’eiki Memipa ‘a e kupu lea ‘iloa ‘a e taki malōlō ‘a e Paati Faka-komiunisi ‘a Siaina, Mao Zedong, ‘a ia ‘oku ‘uhinga ki he lavame’a mo e ikuna ‘a honau kakai ‘oku makatu’unga ia mei he faingata’a mo e pole na’a nau fe’ao mo ia.

‘I he me’a ‘a’ahi ki he Great Wall, na’e me’a ai ‘a Lord Vaea mo e ni’ihi ‘o e Hou’eiki Memipa ‘o ofi ki he Taua Fika 3 ‘i he tafa’aki Faka-Tonga, pea ko e Hou’eiki Memipa ‘e ni’ihi na’a nau me’a ‘o fakalaka ‘i he Taua Fika 4.

Lolotonga ‘enau ‘a’ahi holo ‘i Siaina, na’a nau kau ai ki he ngaahi fakataha mo e ni’ihi ‘o e kau taki mau’olunga ‘o e fonua, me’a ‘a’ahi ki he ngaahi feitu’u kehekehe, feme’a’aki mo e kau fakafofonga mei he pule’anga, ngaahi ako’anga, hoa ngāue ki he fakalakalaka mo e ngaahi kautaha kehekehe kau ai ‘a e ma’u’anga ivi.

Na’e kau ‘i he ngaahi fakataha lalahi na’a nau fakahoko ‘a e fakataha mo e Tokoni Minisitā ko Lu Kang mo e kau ‘ofisiale kehe pe, kau atu ki he alelea ‘a e Paati Faka-komiunisi ‘a Siaina mo e ngaahi Paati Fakapolitikale Fakavaha’apule’anga ‘a ia na’e fakahoko ‘i he vahenga Hebei, ‘a’ahi ki he ngaahi kautaha lalahi hangē ko e CCECC, Hytera, JA Solar Manufacturing Base, Tongfu Smart Farm, Multi-station Integrated DC Microgrid Demonstration project mo e Dongguan Agricultural Technology and Research Center.

Na’e kau ‘i he ngaahi feitu’u na’e me’a ‘a’ahi ki ai ‘a e Hou’eiki Memipa Fale Alea ‘a e ‘a’ahi ki he ngaahi matanga ‘iloa kehe ‘i Siaina hangē ko e Forbidden City, ngaahi misiume mo e ngaahi kautaha lalahi ‘i Siaina.

Na’e kau ‘a e fengāue’aki ‘i he tafa’aki ‘o e ako ‘i he ngaahi kaveinga ne talanoa’i lolotonga ‘a e ‘a’ahi. Na’e ma’u faingāmalie ai pe mo Hou’eiki Memipa Fale Alea ke nau fakataha mo e fanau ako ‘e toko ono ‘oku nau lolotonga ako ‘i he ngaahi ‘univesiti kehekehe ‘i Beijing, ‘a’ahi ki he ‘Univesiti ‘o Shenzhen ki he ‘Oseni, ‘a ia ko e ‘univesiti ko ‘eni kuo ‘i ai ‘enau vā fengāue’aki mo e ‘Univesiti Fakafonua ‘a Tonga ‘o fakamalumalu ‘i he Kautaha Vā Fakakaume’a ‘a Siaina mo e Ngaahi Fonua ‘o e Pasifiki pea ‘oku ‘i ai ‘a e faingamālie sikolasipi ma’ae fanau ako ‘i Tonga ni.

Lolotonga ‘a e ngaahi fakataha na’e fakahoko ‘e he Hou’eiki Memipa Fale Alea mo e kau ‘ofisiale ‘i Siaina na’a nau toe fakamanatu ai ki he ngaahi hoa ngāue ‘i Siaina ‘a e poupou ‘a e Fale Alea ‘o Tonga pehē ki he’ene Hou’eiki Memipa ki he One China Policy , ‘o fakatokanga’i ai ‘a e ngaue ‘a e Pule’anga ‘o Siaina ki hono fakatahataha’i ‘a e fonua pea mo ‘enau matu’aki faka’ikai’i ha ngaue ‘a Taiwan ke tau’ataina. ‘Oku hohoa tatau pe ‘eni mo e tu’unga poupou ‘oku fakahoko ‘e he Pule’anga Tonga ki he kaveinga ni. Na’e fakamahino ai pē ‘e he Hou’eiki Memipa Fale Alea ‘a e mahu’inga ke hokohoko lelei atu ‘a e vā fengāue’aki lelei ‘i he vaha’a ‘o Tonga mo Siaina.

Na’e kau atu ‘i he Hou’eiki Memipa ne nau me’a atu ki Siaina ‘a Hon. Dr. ‘Aisake Valu Eke, Lord Ma’afu, Lord Ve’ehala, Hon. Fane Fotu Fituafe, Hon. Viliami Sisifa, Hon. Mateni Tapueluelu, Hon. Kapeli Lanumata, Hon. Tevita Puloka, Hon. Saimone Vuki, Hon. ‘Esafe Latu, Dr. Sione Vikilani, Yasivou Kalaniuvalu, Saletili Tu’uhetoka mo Linda Filiai.

‘Oku fie fakahā heni ‘e he Fale Alea ‘o Tonga ‘a e hounga’ia mo’oni ki he Lepapulika ‘o e Kakai Siaina, Va’a Ngāue Fakavaha’apule’anga ‘a e Komiti Pule ‘a e Paati Faka-Komiunisi ‘a e Kakai Siaina, Kau ‘ofisiale mo e kau tokoni ki hono fokotu’utu’u ‘a e polokalama ‘a’ahi, ‘Amipasitoa ‘a Tonga ki Siaina, H.E Tau’aika ‘Uta’atu mo e Sekelitali ‘Uluaki ‘a e ‘Ofisi Faka’amipasitoa, mo Tupou Vaipulu ki he ngaahi ngāue kotoa pe ki hono talitali lelei ‘a e Hou’eiki Memipa Fale Alea lolotonga ‘enau ‘i Siaina.

Na’e me’a foki mai ki Tonga ni ‘a e Hou’eiki Memipa Fale Alea ‘i he Tokonaki kuo’osi pea na’e talitali lelei kinautolu ‘i he mala’e vakapuna fakavaha’apule’anga Fua’amotu ‘e he ‘Amipasitoa ‘o e Lepapulika ‘o e Kakai Siaina ki Tonga ni H.E. Mr. Liu Weimin.

Tuku Atu ʻi he Fakangofua ʻe he Kalake Pule ʻa e Fale Aleá

'Aho 19 ‘o Me 2026

'Ofisi 'o e Fale Alea o Tonga, Nuku'alofa, Tonga