‘IKAI KE TALI ‘E HE FAKAMAAU’ANGA LAHÍ ‘A E ‘EKE ‘A E KAU TALATALAAKI ‘I HE HOPO FEKAU’AKI MO E VAKAI’I FAKA- FAKAMAAU’ANGA ‘A E PĀLOTI KE FAKAMĀLŌLOO’I ‘A E PALĒMIÁ

FALE ALEA ‘O TONGA

ONGOONGO TUKU ATU

‘IKAI KE TALI ‘E HE FAKAMAAU’ANGA LAHÍ ‘A E ‘EKE ‘A E KAU TALATALAAKI ‘I HE HOPO FEKAU’AKI MO E VAKAI’I FAKA- FAKAMAAU’ANGA ‘A E PĀLOTI KE FAKAMĀLŌLOO’I ‘A E PALĒMIÁ

Na’e tuku mai ‘e he Fakamaau’anga Lahi ‘o Tongá ‘i he ‘aho Mōnite 8 ‘o Sanuali 2024, ha tu’utu’uni ‘oku ‘ikai ha mafai ia ‘o e fakamaau’angá ke fakamaau’i ‘a e kole ke toe vakai’i faka-fakamaau’anga na’e fakahu atu ‘e he Mēmipa Fale Aleá ‘e toko 7 (Kau Talatalaakí) ko e fakafehu’ia ‘a e tu’utu’uni ‘a e ‘Eiki Sea ‘o e Fale Aleá mo e Fale Aleá ‘i Sepitema 2023 fekau’aki mo e fokotu’u ki ha pāloti ke fakamālōloo’i ‘a e Palēmiá lolotonga, Hon. Hu’akavameiliku. Na’e ‘ikai tali ai ‘e he Fakamaau’anga Lahí ‘a e kole ‘a e Kau Talatalaakí ke vakai’i faka-fakamaau’anga ‘a e ngaue ‘a e Fale Alea.

Ko e tu’utu’uni ‘eni ‘a e fakamaau’anga ‘o fakatatau ki he kole na’e fakahoko ‘e he ‘Eiki Sea ‘o e Fale Alea mo e Fale Alea ‘o Tonga ‘o fehu’ia ‘a e mafai ‘o e fakamaau’anga ke fakatotolo’i ‘a e ngaahi ngaue fakalotofale ‘a e Fale fekau’aki mo e fokotu’u ki ha paloti ke fakamaloloo’i ‘a e Palemia koe’uhi he ‘oku te’eki ai ke monuka ‘a e Konisitutone.

Na’e fakamamafa’i ‘e he Fakamaau’anga Lahí ‘i he ‘ene tu’utu’uní ‘a e tokateline ‘o e mavahevahe ‘o e ngaahi mafai pule pea mo e fiema’u ki he va’a takitaha ‘o e pule’anga ke fakapotopoto ‘a ‘ene ngaue’aki hono ngaahi mafaí pea ke fakahoko ia ‘i loto ‘i hono ngaahi ngatangata’anga fakakonisitutone koe’uhí ke ‘oua ‘e toe kaunoa ‘i he fakahoko ‘e he ngaahi va’a kehe ‘a honau ngaahi ngafa fatongia fakakonisitutone takitaha. Na’e toe pehe foki ‘e he fakamaau’anga ‘oku fiema’u ‘e he tefito’i taumu’a mahu’inga ‘o e pule leleí ke holomui ‘a e fakamaau’anga koe’uhí kae faka’ata ‘a e fakahoko ‘e he Ngaahi Tu’utu’uni ki he Ngaahi Fakataha mo e Ngaahi Fatongia ‘o e Fale Alea mo e ngaahi founga ngaue fakalotofale ‘a e Fale Alea ke ngaue atu ki ha tukuaki’i ‘o ha maumau’i ‘o e Ngaahi Tu’utu’uní koe’uhí kuo fakamafai’i ‘e he Konisitutone ‘o Tonga ‘a e Fale Alea ke ne fa’u ‘ene ngaahi tu’utu’uní, pea ke ne fakahoko ha ngaahi ngaue ‘iate ia pe ke pule’i’aki ‘a e fakahoko ‘a hono ngaahi ngafa fatongia.

Tuku atu ‘e he Kalake Pule ‘a e Fale Aleá
‘Aho 11 ‘o Sanuali 2024
‘Ofisi ‘o e Fale Aleá, Nuku’alofa, Tonga.