Polokalama Talatalanoa fekau’aki mo e Lao Fakaangaanga ki he Fokotuʻutuʻu ki he Sipoti ʻa e Pasifiki 2026

LEGISLATIVE ASSEMBLY OF TONGA

PRESS RELEASE

 Polokalama Talatalanoa fekau’aki mo e Lao Fakaangaanga ki he Fokotuʻutuʻu ki he Sipoti ʻa e Pasifiki 2026

Fakahoko ‘e he Fale Alea ‘o Tonga ha Polokalama Talatalanoa fekau’aki mo e Lao Fakaangaanga ki he Fokotuʻutuʻu ki he Sipoti ʻa e Pasifiki 2026

‘Oku ‘amanaki ke fakahoko ‘e he Komiti Tu’uma’u ‘e tolu ‘a e Fale Alea ‘o Tonga ha Polokalama Talatalanoa mo e kakai ‘o e fonua fekau’aki mo e Lao Fakaangaanga ki he Fokotu’utu’u ki he Sipoti ‘a e Pasifiki 2026.

‘E kau ki heni ‘a e Komiti Tu’uma’u ki he Ngaahi Me’a Fakasōsiale, Komiti Tu’uma’u ki he Pa’anga mo e Komiti Tu’uma’u ki he Lao, pea ‘e fakahoko ‘a e Polokalama Talatalanoa ‘i he taimi 2 efiafi, Falaite 2 ‘o ‘Okatopa, ‘i he Fale Fakataha’anga ‘a e Fale Alea ‘o Tonga ‘i Nuku’alofa.

Ko e Polokalama Talatalanoa ko e faingamalie ia ki he kakai ‘o e fonua ke nau toe ‘ilo lahi ange ki he Lao Fakaangaanga ki he Fokotu’utu’u ki he Sipoti ‘a e Pasifiki, vahevahe mai ‘enau fakakaukau, ‘omai ha ngaahi fehu’i pe ko ha fokotu’u fakakaukau fekau’aki mo e Lao Fakaangaanga. Ko e Polokalama Talatalanoa ‘oku fakahoko ia ke tokoni ke toe ‘ilo lahi ange ‘a e kakai ‘o e fonua ki he Lao Fakaangaanga, faka’ai’ai ‘enau kau mai, pea fakapapau’i ‘oku fakakau ‘enau ngaahi fakakaukau ‘i he ngaahi fokotu’utu’u mo e ngāue ki he Lao Fakaangaangaʹ.

Ko e taumu’a ‘a e Lao Fakaangaanga ni ke fokotu’u ‘a e fokotu’utu’u fakangaue ki he Sipoti ‘a e Pasifiki 2031 ‘e fakahoko ‘i Tonga ni. ‘Oku fakataumu’a pe ke ngāue’aki ‘o a’u ki he faka’osinga ‘a e Sipoti ‘a e Pasifiki ‘o e 2031. Ko e taimi pe ‘e kakato ai, ‘e fakapekia leva ‘a e Lao Fakaangaanga ni.

‘Oku fokotu’u ‘e he Lao Fakaangaanga ko ‘eni ‘a e Komiti Fokotu’utu’u pea ‘oku ne fokotu’u ‘a e ngaahi tu’utu’uni lahi kehe ‘oku fiema’u ‘e he Kosilio Sipoti - ‘o tatau ai pe ‘i he aleapau ke fakahoko pe ‘i he Tohi Fa’unga Sipoti. Ko e lahi taha ‘o e ngaahi kupu ‘i he Lao Fakaangaanga ni ‘oku fakamalohia ia ‘o fakatatau ki he fiema’u ‘a e Kosilio Sipoti – ko e ngaahi tu’unga ia ‘o e ma’u ‘e Tonga ke fakahoko ‘a e Sipoti. Ko e ngaahi fiema’u ko ‘eni ko e makatu’unga angamaheni pea ‘oku hilifaki ia ki he ngaahi fonua kehe kuo foaki ki ai ‘a e Sipoti ‘a e Pasifiki ‘i he ngaahi taimi kimui ni mai.

Ko e Lao Fakaangaanga ni na’e fakahū mai ia ki Fale Alea ‘e he ‘Eiki Minisitā ‘o e Potungāue ki he Ngaahi Ngāue Fakalotofonua, Hon. Fane Fotu Fituafe, ‘i he ‘aho 24 ‘o ‘Akosi 2026. Na’e tēpile’i ‘a e Lao Fakaangaanga ni ‘i he Fale Alea ‘i he ‘aho 8 ‘o Sepitema 2026, pea ‘i he ‘aho tatau na’e tukuhifo ai ki he Komiti Tu’uma’u ‘e tolu ke nau ngāue ki ai.

‘Oku ‘oatu heni ‘a e fakaafe ki he kakai ‘o e fonua, kupu fekau’aki, ke nau kau mai ki he Polokalama Talatalanoa ni.

Ki ha toe faka’eke’eke fekau’aki mo e Lao Fakaangaanga pe ko e Polokalama Talatalanoa, kataki fetu’utaki ki he 24-455 pe ko ho’o ‘a’ahi ki he uepisaiti ‘a e Fale Alea ‘i he www.parliament.gov.to.

Ngata’anga

Tuku Atu ʻi he Fakangofua ʻe he Kalake Pule ʻa e Fale Alea
ʻAho 1 ‘o ‘Okatopa 2026
ʻOfisi ʻo e Fale Alea ʻo Tonga, Nuku’alofa, Tonga.