TUKU ATU ‘A E FAKAAFE MEI HE ‘EIKI SEA FAKATAIMI KE FAKAHŪ MAI HA FOKOTU’U ‘O HA KAU KANITITEITI PALEMIA

‘Ofisi ‘o e ‘Eiki Sea Fakataimi ‘o e Fale Alea ‘o Tonga
Fale Alea ‘o Tonga
Nuku’alofa
Tel: +676 27912/24455|www.parliament.gov.to|P.O Box 901|Nuku’alofa, Tonga

ONGOONGO TUKU ATU

TUKU ATU ‘A E FAKAAFE MEI HE ‘EIKI SEA FAKATAIMI

KE FAKAHŪ MAI HA FOKOTU’U ‘O HA KAU KANITITEITI PALEMIA

Kuo fakanofo ‘e he ‘Ene ‘Afio Kingi Tupou VI ‘a Rt. Hon. Lord Tangi ‘o Vaonukonuká ko e Sea Fakataimi ‘o e Fale Alea ‘o Tonga. Ko hono tu’o tolu ‘aki ‘eni ‘a hono fakanofo ia ki he lakanga ni, ‘a ia na’e fakahoko fatongia ko e Sea Fakataimi ‘i he ta’u 2017 mo e 2021.

Kuo tuku atu ai ‘e Lord Tangi ‘i he ‘aho Mōnite 1 ‘o Tīsema 2025, ha fakaafe ki he kotoa ‘o e kau fakafofonga ‘o e Fale Alea kuo fili ke fakahū mai ha’anau ngaahi fokotu’u ‘o ha kanititeiti Palemia kimu’a ‘i he taimi 4.30 pm ‘o e ‘aho Falaite 12 ‘o Tīsema 2025. Kuo fakaha foki ‘e he Sea Fakataimiˊ ki he kotoa ‘o e kau fakafofonga kuo filiˊ ‘oku fakaangaanga ke fakahoko ‘enau fakataha ke fili ‘a e Palemia Fili ‘i he ‘aho Mōnite 15 ‘o Tīsema 2025.

‘E tataki ‘e he Sea Fakataimí ‘a e ngaahi ngāue ‘a e Fale Aleá ‘o fakatatau ki he Konisitutoné kae’oua kuo fili ‘a e Palēmia Filí. ‘Ikai ngata aí, te ne tataki foki mo e ngāue ki hono fili ‘a e Sea ‘o e Fale Aleá mo e Tokoni Sea ‘o e Fale Aleá ki he to’u Fale Alea ‘o e 2025-2029. ‘Oku fakapapau’i ‘i hono fakanofo ‘o e Sea Fakataimí ‘e kei hokohoko atu ‘a e fakahoko lelei ‘o e ngāue ‘a e Fale Aleá lolotonga ‘a e vaha’ataimi ko ‘ení, ke fakapapau’i ko e ngāue ki hono fili ‘o e Palēmia Filí ‘oku fakahoko ia ‘o fakatatau ki he Lao ‘o e Konisitutone ‘o Tongá.

‘E hokohoko ai pē hono tuku atu mei he ‘Ofisi ‘o e Sea Fakataimí ‘a e tu’unga fakamuimuitaha ‘o e ngāue ki he fili ‘o e Palēmia Filí.

Tuku atu ‘e he Kalake Pule ‘o e Fale Alea ‘o Tonga

‘Aho 2 ‘oTīsema 2025